Инқилобий Lenovo Z5 илк расмий тизерларда: унчалик ҳам ромсиз эмас экан!
Барча смартфонсозлар орасида ромсиз экран дизайнида мобил қурилмалар яратиш урфга кирганидан хабарингиз бор. Жорий йил май ойининг бошида эса Lenovo бу борада ҳаммасидан илғор девайс тайёрлаганини маълум қилди.
ЎҚИНГ: Lenovo «ҳақиқий ромсиз» смартфонни кўрсатди (+видео)
Кейинчалик эса хитойлик компания ушбу флагмани ҳақида бир-биридан қизиқ маълумотларни битта-биттадан ошкор эта бошлади. Жумладан, шу пайтгача Lenovo Z5 номли бу смартфоннинг нақ 4 терабайтлик доимий хотирага эга эканлиги; мобил фотосуратчиликда бурилиш ясаётгани; ҳатто аккумуляторининг қуввати 0 фоизга тушганда ҳам ишлайвериши; битта тўла қувват билан 45 кунгача ишлай олиши; корпусининг орқа панели шишадан эканлиги айтилган ва олд панелини тўлалигича акс эттирган сурати чиққан.
5 июнь куни расман тақдим этиладиган Lenovo Z5 намойиши олдидан компания ходимлари унинг айрим қисмлари акс эттирилган тизерларни эълон қилишди. Уларга қараб айтиш мумкинки, бу смартфон барибир ромдан холи эмас экан – пастида ром кўзга ташланади.
Бир жиҳати эътиборга лойиқ – Lenovo расмий тизерларда Z5 дисплейининг юқори қисмини кўрсатишдан қочяпти. Демак, ё бу смартфон ҳам кўпчилик янги флагманлар қатори iPhone X дизайнида «кемтик»ли бўлади, ёки унинг «ўйиқ»сиз эканини компания охиригача сир сақлаб турмоқчи.
Lenovo Z5 қўшалоқ камерали ва юқори хусусиятларга эга смартфон бўлиши кутилмоқда, аммо ишлаб чиқарувчи уни тавсифлашда сал бўрттириброқ юборган бўлса керак. Масалан, 4 терабайтлик хотира ҳақида гап кетганида, компания смартфоннинг локал – ички хотираси эмас, балки бирор «булут»ли сақлагични назарда тутган бўлиши мумкин, дейишмоқда кузатувчилар.
Нима бўлганда ҳам, буларнинг барчасига аниқлик киритилишига оз вақт қолди: Lenovo Z5 тақдимоти эртага – 5 июндаёқ бўлиб ўтади. Унинг фақатгина Хитой бозорига чиқарилиши тахмин қилинмоқда, лекин шундай бўлган тақдирда ҳам, хоҳловчилар уни онлайн савдо платформаларидан сотиб олиш имкони бўлар балки.
ЎҚИНГ: AliExpress’даги товарларга «Terabayt.uz» орқали буюртма беринг!
