Instagram’га суратларни компьютердан юклаш йўли топилди!
Фотосуратлар ишқибозларининг энг севимли ижтимоий тармоғи Instagram ҳисобланади. 2018 йилнинг июнида унинг фаол фойдаланувчилари сони бир миллиарддан ошган.
ЎҚИНГ: Актриса ва хонандаларимиз Instagram’да қанчалик фаол?
Оммабоплиги бўйича Facebook тармоғидан кейин иккинчи ўринда турувчи Instagram’да ҳар куни «Лайк» тугмачасини 4,2 миллиард марта босишади. Аммо у мобил қурилмаларга мўлжалланган бўлиб, ижтимоий тармоқ компьютердан (ёки ноутбукдан) расм юклашга изн бермайди. Бироқ тиниб-тинчимаган одамлар бунинг йўлини топишган ва истасангиз, сиз ҳам шундай қилишингиз мумкин.
Бунинг учун компьютерингиздаги одатий браузердан мана бу ҳавола орқали Instagram сайтига кирасиз. Пайқаганингиздек, унинг интерфейсида расм эълон қилиш тугмачаси йўқ. Бироқ уни чиқариш учун браузернинг дастурчиларга мўлжалланган консолини ишга туширамиз. Google Chrome ёки Yandex Browser дастурларида бунинг учун экрандаги бўш жойга сичқончанинг ўнг тугмачаси билан чертиш ва очилган контекст менюдан «Унсурни тадқиқ этиш» – «Исследовать элемент» бандини босиш лозим.
ЎҚИНГ: Instagram’да бошқаларга «кўринмасдан» кузатиш мумкин
Кейин эса планшет ва смартфон акс эттирилган белгича – «Toggle Device Toolbar» тугмачасини босамиз. Ушбу функция сайт экранининг ўлчамини ўзгартириш имконини беради.
Экраннинг юқори ҳудудида қурилмани танлаш имконияти пайдо бўлади. Исталган бир смартфонни танлаймиз ва саҳифани янгилаймиз.
Шундан сўнг Instagram сизни сайтга мобил қурилмадан кирган, деб ҳисоблайди ва расм эълон қилиш учун «+» шаклидаги белгичани акс эттиради. Марҳамат, энди унга сурат юклашингиз мумкин!
Бу – айни дамда суратларни Instagram’га компьютер орқали юклашнинг жуда содда усулидир. Аммо бу усулда видеолавҳани ёки битта постда бир нечта суратлар туркумини эълон қилиб бўлмайди. Шундай бўлса-да, смартфонни қўлга олмасдан, бирор расмни компьютернинг ўзиданоқ юклаш учун бу жуда қулай усул.
ЎҚИНГ: Ҳар қандай смартфонда бемалол ишлай оладиган Instagram Lite чиқди!
