Intel $1999 долларлик Core i9 процессорини тақдим қилди
30 май куни Тайвандаги Computex анжуманида Intel компанияси янги Core X процессорлар туркумини тақдим қилди. Бу туркумдан айни вақтда ишлаб чиқарилаётган Core i5 ҳамда Core i7 моделларининг янада кучли талқинлари, шунингдек янги — янада юқори салоҳиятли Core i9 флагман процессори ўрин олган.
Core X чиплари платформаси биринчи галда замонавий, ўта юқори пиксел сиғимли ва графикага бой ўйинларни ўйнаш баробарида томошабинларга видео оқимини узатишни хуш кўрувчи геймерларга мўлжалланган. Умуман бу чиплар компютерини кучли ва ҳар қандай кўринишдаги маълумотларни тезкор қайта ишлашда имкониятлари кенг процессор билан таъминлаш истагидаги фойдаланувчиларга мўлжалланган.
Салоҳият ва нарх
Мураккаб функцияларни бажарувчи Core i9 Extreme процессори $1,999 долларга баҳоланган. Intel маълум қилишича, бу процессор кенг истеъмолчилар қатламига мўлжалланган 18 ядро ва 36 оқимли илк стол компютери процессоридир. Core i9’нинг энг арзони, яъни 12 ядро ва 24 оқимли маълумотни қайта ишлайдиган талқини $999 ҳамда 16 ядро ва 32 оқимлиси $1699 долларга баҳоланган.
Core X туркумининг энг ҳамёнбоп модели — Core i5-7640X бўлиб, $242 доллар туради ва 4 ядро ва маълумотларни 4 оқимда қайта ишлай олади. 4 ядро ва 8 оқимли Core i7 X-Series чипи $339, унинг 10 ядроли ва 20 оқимли талқини $599 доллар туради.
Барча янги Core X процессорлари Intel X299 “она плата”сига мўлжалланган янги чипсетда ишлайди. Core X туркумидаги деярли барча процессорлар Intel’нинг 6-авлоди бўлган Skylake платформасининг янгиланган талқинидир. Шу боис ҳам компания уларни Skylake X деб номлаган. Фақатгина i5-7640X ва i7-7740X процессорлари Kaby Lake X архитектураси асосида ишлаб чиқарилмоқда.
Turbo Boost Max 3.0
Intel, шунингдек Turbo Boost Max 3.0 технологиясини намойиш қилган. Компаниянинг маълум қилишича, Turbo Boost Max 3.0 ҳар бир ядронинг самарадорлигини оширади. Унинг ёрдамида кўп оқимли режимда Core X процессорлари 10 фоизга, бир оқимли режимда эса 15 фоизга самарали ишлайди.
