iOS 10’ни қўллаб-қувватловчи (ёки аксинча) қурилмалар маълум қилинди
Apple янги имкониятларга бой iOS 10 операцион тизимини ишга туширди. Аммо бахтга қарши у iPhone ҳамда iPad’ларнинг эски талқинларида ишламайди.
Apple 13 июнь куни Жаҳон Дастурчилари Анжуманида дастур ишлаб чиқарувчиларига эътиборига эълон қилган операцион тизимни қўллаб-қувватлайдиган қурилмалар рўйхатини эълон қилди. Унга кўра Apple’нинг iPhone 5 ва ундан кейинги смартфонлари, Apple’нинг iPad Mini ва унинг кейинги авлодлари, iPad 2 ва ундан кейинги шу турдаги қурилмалар, iPod’нинг 5- ва 6-авлод сенсорли қурилмалари фойдаланувчилари янги iOS 10 мобиль операцион тизимини юклаб олишлари мумкин.
iOS 10 мобиль операцион тизимини янгилаб олиш мумкин бўлган қурилмаларнинг тўлиқ рўйхати
Apple имкон қадар кўпчилик фойдаланувчилари мазкур инновацион талқиндаги операцион тизимни янгилаши тарафдори. Ишлаб чиқарувчилар, дастурчилар эса энди унинг оммабоплигига қараб янги дастурларни ишлаб чиқарадилар.
Анжуманда эълон қилинган яна бир муҳим ўзгариш Siri — овозли ёрдамчисини, электрон харита тизимини такомиллаштириш ишларида хоҳловчи, яъни Apple ходими бўлмаган дастурчиларнинг ҳам қатнашишига имкон берилгани бўлди. Натижада дастурчилар Siri’ни ва харитани ўз иловалари билан яхлитлаштиришлари мумкин.
Қолаверса, янги тизим харидорларга iPhone’даги ўзлари учун кераксиз деб топилган иловаларни смартфон хотирасидан ўчириш имкониятини беради. Бу имконият Android фойдаланувчиларига ҳали берилмаган.
Модомики, компания янги операцион тизимни олдинги айфонларга ҳам мослаштирмас экан, унда 2011 йилда эълон қилинган, ҳали ҳам оммабоп бўлган (жаҳон миқёсида ундан фойдаланувчилар айфон фойдаланувчиларининг 5 фоизини ташкил этади) iPhone 4s, iPad, iPod’нинг эски талқини iOS 10’дан фойдалана олмайдилар.
Ҳозирча iOS 10’нинг синов талқини дастурчилар ихтиёрига топширилди. Оммавий синовдан ўтказиш эса июлдан бошланади. iOS 10 операцион тизими тўлиқ шаклда 2016 йилнинг кузида эълон қилинади.
