iOS 12.1 «сотиб қўйди»: Face ID функцияли iPad Pro шу кузда чиқади!
Apple компанияси куни кеча дастурчилар учун iOS операцион тизимининг 12.1 талқинидаги тест версиясини тақдим этганди. Аммо ўз ишининг усталари унинг кодини ўрганиб, купертиноликлар яширган бошқа маълумотни ҳам топишди.
ЎҚИНГ: iOS 12 янгиланиши бошланди: энди эски iPhone’ларга ҳам жон киради
Хулласи калом, операцион тизим кодини «кавлаштирган» дастурчилар унда кейинги авлод iPad Pro планшетларининг яқинда тақдим этилишига ишора қилувчи элементларни топишди.
Прошивка кодидаги iPad2018Fall ҳаволаси 2018 йилда чиқарилаётган iPad Pro’ни англатади. Бундан аввалги – iOS 12 талқинидаги прошивка кодида эса фақат iPhone2018Fall тилга олинган эди – у яқинда тақдим қилинган айфонларга ишорадир. Демак, Apple ўзининг янги планшетларини ҳам шу кузнинг ўзидаёқ расман намойиш этмоқчи.
ЎҚИНГ: Янги iPad Pro орқасида сирли «тирқиш» бор... (+«жонли» сурат)
Бундан ташқари, коддан маълум бўлишича, iPad Pro планшетларининг горизонтал режимида фойдаланувчини юзидан таниб қулфни очувчи Face ID функцияси ҳам амал қилади.
Афтидан, купертиноликлар янги iPad Pro ҳамда ноутбукларини октябрь ойидаги алоҳида матбуот анжуманида тақдим этишмоқчи. Аввалроқ тарқалган маълумотларга кўра, планшетлар экран ўлчамига кўра икки хил – 11 ва 12,9 дюймлик бўлади. Улар худди iPhone X сингари ромсиз ҳамда Touch ID – бармоқ изи сканерисиз, аммо Face ID билан таъминланади.
