iOS 16, янги MacBook Air ва VR кўзойнак?

Apple ўзининг ҳар йили бўлиб ўтадиган Worldwide Developers Conference (WWDC) 2022 тадбирининг бу йилги сонини 6 июндан 10 июнга қадар ўтказишни режалаштирган. Конференсиянинг илк кунида купертинолик компания ўзининг тақдимотини ўтказади ва бу Apple'нинг йилдаги асосий тадбирларидан биридир ва у кўпроқ Apple қуриламалари учун дастурий таъминотларнинг янги версияларига қаратилган бўлади.

iOS ва iPadOS 16

WWDC'нинг 2022 йилги сонида Apple мухлислари iOS ва iPadOS операцион тизимларининг ўн олтинчи версиясини кутишмоқда. Bloomberg'дан Марк Гурманнинг хабар беришича iOS 16 анчадан бери Android қурилмаларда бўлган "always-on display" хусусиятига эга бўлади ва бу функсия iPhone 14 Pro смартфонларига чиқарилади. Health ва Messages, шу билан бирга, билдиришномалар ҳам сезиларили яхшиланишларга эга бўлиши мумкин. Шунингдек, янгиланиш Android стилидаги автоҳалокатни аниқлаш ва бунда фавқулодда ҳолат учун белгиланган телефон рақамга қўнғироқ қилиш хусусиятини ўз ичига олиши айтилмоқда.

iPadOS учун эса кўп вазифали ишларни қилишда яхшиланиш амалга оширилиши, хусусан, очиқ ойналарнинг ўлчамини бошқариш каби хусусиятлар қўшилиши айтилган ва бу планшетни ноутбуклар билан рақобатлашувини оширади.

MacBook Air ва М2

Миш-мишларга қараганда, тадбирда қайта дизайнланган MacBook Air катта эҳтимол билан тақдим қилинади. Янги ноутбук 24 дюймли iMac рангларида чиқарилиши айтилаётган эди, лекин сўнгги янгиликларга кўра, Apple MacBook Air'нинг эски модели рангларини сақлаб қолади. Шунингдек, хабарлар шуни тасдиқлайдики, тадбир давомида янги авлод Apple чипи, М2 ҳам тақдим қилиниши, балки у MacBook Air билан дебют қилиши мумкин.

AR/VR қурилмаси

Аппле анчадан бери ўзининг метаолам учун кириш "эшиги"ни яратаётганлиги ва у бу йилги WWDC'да тақдим қилиниши ҳақида айтилаётган эди. Бироқ, душанбани гапи пайшанбага тўғри келмаяпти. Бир неча кун олдин купертинолик компания AR/VR қурилмасини чиқариши айтилаётган бўлса, бугунга келиб у 2023 йилга қолдирилгани айтилмоқда. Маълум бўлишича, Apple'нинг AR/VR қурилмаси ҳали тайёр эмас ва унинг ишлашида бир қанча муаммолар бор. Шундай экан, эртага Apple'дан бу янги маҳсулотни кутманг.

MacOS13, tvOS 16 ва WatchOS 9

iOS ва iPadOS каби Apple'нинг яна бошқа муҳим платформалари бор ва WWDC 2022, албатта, уларсиз ўтмайди. Watch OS 9'да худди iPhone'да бўлгани каби "кам қувват" режими ва iPhone'дан туриб соат экранини бошқариш имконини берувчи режим қўшилиши ва албатта, Watch учун янги дизайндаги кўринишлар чиқарилиши кутилмоқда.

macOS Mammoth (мамонт) деб номланиши айтилаётган macOS 13 ҳақида унчалик кўп хабарлар мавжуд эмас, лекин у iPhone'ники каби Focus режимига эга бўлиши мумкин.

Apple'нинг 33 WWDC тадбири келаётган душанба, 6 июн куни Тошкент вақти билан 22:00 да онлайн ўтказилади ва уни сиз Apple'нинг расмий веб-сайтида ёки YouTube саҳифасида жонли томоша қилишингиз мумкин бўлади.

ЎҚИНГ: Apple iPhone нархлари билан танишамиз (2022 йил, июн)