iOS тизимига 2015 йилдаёқ жорий этилган функция Android Q талқинига энди қўшиляпти! (+видео)

  •   DiMaX
  •  1127
  •  08.04.2019 18:13

iOS тизимига 2015 йилдаёқ жорий этилган функция Android Q талқинига энди қўшиляпти! (+видео)

Google компанияси ўнинчи авлод – Android Q операцион тизимининг аллақачон биринчи, сал ўтиб эса иккинчи бета-версияларини тақдим этди. Аммо уни фақат бета-тестерлар дастуридагилар синаб кўриши мумкин, кенг фойдаланувчилар эса мазкур тизимнинг кўп функцияларини ҳали кейинроқ кўрадилар.

ЎҚИНГ: Android Q обойлари ва рингтонларини ҳозирданоқ ўрнатиб олишингиз мумкин!

Android 10 Q талқинига қўшилаётган янги функциялардан бири фойдаланувчининг смартфон билан ўзаро мулоқотининг янги усулини таклиф этади. Қизиғи – ушбу имкониятни Apple компанияси iOS тизимли қурилмалар фойдаланувчиларига 2015 йилдаёқ тақдим этган эди.

Бу – экраннинг сенсори тегинишнинг кучини фарқлаши ва турли босим билан босганда тегишли реакция қайтариши функциясидир. iOS тизимида ушбу технология 3D Touch деб номланиб, илк бора iPhone 6S ва iPhone 6S Plus моделларида татбиқ этилган.

Мана, iOS тизимидаги бу функциянинг ишлашини видеода кўрамиз:

Android Q тизимининг дастурчиларга мўлжалланган ҳужжатларида қурилмани бошқаришга бағишланган «MotionEvent» бўлими мавжуд. Шу ерда «чуқур тегиниш» деган янги атама пайдо бўлган – у фойдаланувчининг сенсор экранга кучлироқ босишини англатади. Унинг тавсифида ёзилишича, бу – узоқ босиб туришнинг тезлаштирилган вариантидир. Яъни, Android’нинг ҳозирги талқинларида узоқроқ босиб туриш орқали ишга тушириладиган функцияларни янги версиядаги тизимда кучлироқ босиш орқали тезроқ бажариш мумкин бўлади.

iOS тизимида ишловчи ва 3D Touch функциясига эга айфонлар экранга енгил, ўртача ва кучли босишни фарқлай олади, чунки уларда бунинг учун махсус босим датчиклари мавжуд. Тавсифга кўра, Android-қурилмалар шунчаки бундай қобилиятга эга эмас – уларнинг сенсори бошқача. Хуллас, Google ушбу янги опцияни смартфонларга қай тариқа жорий этиши ҳозирча номаълум. Бу борадаги янгиликлардан биринчилар қаторида бохабар бўлиш учун бизни кузатишда давом этинг.

ЎҚИНГ: Қайси смартфонлар эгалари Android Q’ни биринчилар қаторида синаб кўришади?

Сайт янгиликларидан доимий хабардор бўлиш учун Телеграм каналимизга қўшилинг!