iOS учун Chrome иловасида кейинчалик ўқиш функцияси пайдо бўлди

Энди iPhone ва iPad соҳиблари ўз қурилмаларидаги Chrome иловасининг янги имкониятидан фойдаланишлари мумкин. Мазкур браузер сизга ёққан веб-саҳифаларни кейинчалик ўқишингиз учун сақлаб қўйишни «ўрганиб олди». Аммо, айтиб ўтиш керакки, худди шу функция Safari’да бирмунча қулайроқ йўлга қўйилган.

Chrome’даги Read Later («Кейинроқ ўқиш») функцияси орқали сақлаб қўйилган саҳифаларни кейинчалик – ҳатто интернетга уланишсиз ҳам ўқиш имкони мавжуд. Бундай функциялар оммабоп Pocket сервисида, ва Safari браузерида ҳам мавжуд.

Chrome саҳифани яхлитлигича сақлаб қўйса, Pocket ва Safari унинг соддалаштирилган матн версиясини олиб қўяди. Тағин, Pocket ва Safari’да сақлаб қўйилган саҳифаларни ўз аккаунтингиздаги бошқа қурилмаларингиздан ҳам кириб ўқишингиз мумкин, Read Later ёрдамида сақланган саҳифаларни эса – фақат шу қурилманинг ўзидаги Chrome орқали. Mac учун ишлаб чиқилган Chrome эса кейинчалик ўқиш функциясини умуман қўллаб-қувватламайди.

Эслатиб ўтамиз, Android учун ишлаб чиқилган Chrome иловасига кейинчалик ўқиш функцияси ўтган йилнинг декабрида қўшилган эди. Chrome саҳифаларни ҳам худди бошқа файллар каби – юклаш белгичаси орқали сақлаб қўяди. Уларни «кейинга олиб қўйилган мутолаа» сифатида эмас, балки фақатгина юклаб олинган контент сифатида кўриш мумкин.