iPad Air 3: мукаммаллик сари яна бир қадам
iPad Air қурилмасининг янги талқини тўғрисидаги гап-сўзлар деярли бир ярим йилдан буён қулоққа чалинади. Ниҳоят, тақдимотга оз қолган кўринади. Тармоқларда қурилманинг илк суратлари кўрина бошлади. Бу гаджетни интизорлик билан 2015 йилда кутган эдик. Аммо унинг ўрнига компаниянинг iPad Pro ва iPad Mini 4 алоқа воситалари тақдим қилинди.
Apple iPad Air 3 планшетини март ойида, iPhone 5SE мобиль алоқа воситаси билан бирга, ва iPhone 7 телефонидан аввал тақдим қилмоқчи. Бу тўғрида Хитойнинг MyDrivers техника блоги хабар тарқатган.
MyDrivers блогининг ёзишича, планшет 9.7 дюймли экран, тасвирни 4K технологиясида кўриш мумкин бўлган 2,334 x 3,112 сиғимли дисплейга эга бўлади. iPad Air 2 гаджетида пикселлар сиғими 1,536 x 2,048 эканлигини инобатга олсак, компания учун бу жуда катта сакраш бўлади.
Маълумотларга кўра, iPad Air 3 стерео овозга эга бўлади ва унинг пастки ва юқори том қисмида иккитадан, жами тўртта карнай мавжуд. Гаджет кўринишидан 2015 йилнинг 9 сентябрида намойиш қилинган, илк бой аудио дизайнга эга iPad Pro планшетига ўхшаб кетади. Бу тўғрида Nowhereelse француз блоги хабар тарқатган.
Кенг частота диапазонига эга динамикалар фильм ва телеканалларни томоша қилиш, мусиқа тинглашни хуш кўрганлар учун айни муддао.
Эсингизда бўлса, 2014 йилнинг 16 октябрида тақдим қилинган iPad Air 2 планшетида фақатгина қуйи қисмида иккита карнайга эга бўлган.
iPad Air 3 орқасида 8 iPad Air 2’ники каби, 8МП, олдида эса 2.1МП камера бўлади. Шунингдек, бу йўналишдаги янгилик – LED технологиясидаги фоточақноқ қоронғида ҳам яхши тасвирга олиш имконини беради. Яна бошқа манбааларда асосий камеранинг 13МПгача бўлиши тахмин қилинган.
Тасдиқланмаган манбаанинг хабар беришича, планшетларнинг янги вакили кенг функцияларга эга бўлиши кутилаётган iOS 10 мобиль операцион тизими билан таъминланади. Siri виртуал ёрдамчи ҳамда Apple Maps харита тизими билан кўпчилик айфон мухлисларини хурсанд қилган iOS 9 тизимидан кейин iOS 10’дан янада кўпроғини кутишимиз табиий.
Қурилма Apple A9 — икки ядроли, 64 битли, ARMv8 архитектурасига асосланган ARM-микропроцессорига эга бўлиши мумкин. Бу эса гаджетнинг тезкор фаолиятини таъминлайди.
Тезкор хотира масаласида iPad Pro’нинг 4ГБ хотирага эгалиги, планшет саноатида компания нуфузини кўтариш мақсадида тақдим қилинган Pro сериясидаги қурилмаларнинг тезкор хотираси 4 ёки 3 ГБдан кам бўлмаслигини кафолатлаши мумкин. Шунингдек, мобиль қурилма камида 32ГБ қўшимча хотирага эга бўлади.
У ўзининг 5 мм юпқалиги билан ҳам ҳайратланарли. Шундоқ ҳам бу жиҳатдан 6.1 мм қалинликдаги iPad Air 2 ҳаммани ҳайратга солган эди. Қурилмада сув ва чанг таъсирига бардошлилик технологияси қўлланилади. Агар бу тўғри бўлса, у Халқаро Электротехника коммиссиясининг рейтингида компаниянинг Apple Watch’дан сўнг юқори ўрин олувчи иккинчи қурилмасига айланади.
Бироқ, қувват тоши, яъни аккумулятор масаласида iPad Air 3 фойдаланувчиларни хафа қилиш мумкин. Боиси унинг аккумулятори iPad Air 2’ники каби 7,340 мAс сиғимига эга бўлиши кутилмоқда. Бу эса ундан 10 соат мобайнида фойдаланиш имконини беради.
Гаджетда Apple Watch ва iPhone 6S қурилмаларида татбиқ қилинган 3D Touch технологиясини ҳам кўриш мумкинлиги айтилмоқда.
Аммо, Apple маҳсулотларининг шарҳловчиси бўлган Apple Insider нашрининг ёзишича, KGI Securities онлайн савдо консалтинг хизмати таҳлилчиси Минг Чи Куо ушбу технологияни етказиб бериш билан боғлиқ муаммолар сабаб iPad Air 3’да 3D Touch технологиясининг қўлланмаслигини айтган.
Фойдаланувчилар iPad Air 3’да Apple’нинг бармоқ излари сканери технологияси – Touch ID’нинг татбиқ қилиниши зарурлиги юзасидан таклифлар билдиришган.
Бунгача компания Air сериясидаги 2013 йилнинг ноябрь ойида iPad Air’ни, 2014 йилнинг октябрь ойида iPad Air 2’ни тақдим қилган эди. Аммо бу қурилмалардаги хотира, операцион тизим ва дастурлардаги камчилик туфайли улар фойдаланувчиларнинг катта қизиқишига сабаб бўлмади, бозорда кутилганидек оммалашмади. Apple компанияси маълумотларига кўра, сўнгги тўрт чоракда iPad қурилмалари савдоси 19%га камайган. Айни кунларда планшет бозорида Apple’нинг Sony Xperia Z4 Tablet, Samsung Galaxy Tab S2 ва Google Pixel C каби Android рақобатчилари етакчиликка даъво қилишмоқда.
Ҳозирча iPad Air 3’нинг 560-600 АҚШ долларидан сотилиши кутилмоқда. 64ГБ қўшимча хотирага эга iPad Air 2 гаджети Amazon интернет дўконида етказиб бериш харажатлари билан бирга 519.90 АҚШ долларидан сотилмоқда.
