iPad mini 5 мустаҳкамлигини аёвсиз синаб кўрган техноблогер ҳайратга тушди! («жонли» видео)
Apple компанияси яқиндагина бешинчи авлод iPad mini планшетини тақдим этган эди. Мутахассислар унинг ичини очиб кўриб, таъмирга яроқсиз эканини аниқлашган, аммо фойдаланувчи учун энг муҳими – бу гаджет ҳадеганда таъмирга муҳтож бўлавермас экан.
JerryRigEverything номли YouTube-канал муаллифи – машҳур техноблогер Зак Нильсон ушбу планшетни аёвсиз синаб кўрди. Унинг таъкидлашича, iPad mini 5 экрани устига тобланган шиша ётқизилган ва ҳар қандай замонавий смартфон дисплейи каби тирналиш даражасига эга. Унга чизиш учун етарлича қаттиқ жисм билан тирнашга тўғри келади. Худди шу гапни «Уйга» тугмачасидаги бармоқ изи сканери ҳақида ҳам айтиш мумкин.
Аммо алюминийдан ишланган корпуснинг бошқа барча жойлари осонгина тирналади. Зак Нильсон буни исботлаш учун iPad mini 5 орқа панелига Marvel кинокомикслари қаҳрамони – Танос суратини чизиб кўрсатган.
Apple Pencil стилусини қўллаб-қувватловчи IPS-экранни видеоблогер олов билан ҳам синаб кўрган. Аланга таъсирида у қорайиб қолган, лекин сал вақт ичида пикселлар тикланиб, одатий ҳолатига қайтган.
Кўплаб планшетлар қатори iPad mini 5 корпуси ҳам осон букилар экан. Лекин ҳатто букилган ҳолатида ҳам бу қурилма ўз иш қобилиятини йўқотмасдан, бемалол ишлайвергани Зак Нильсонни ҳайрон қолдирган.
ЎҚИНГ: «Қотиб» ишлаётган iPhone ёки iPad тезкор хотирасини тозалашнинг энг оддий ва самарали усули
