iPad Pro’нинг PC-компьютеридан ожиз жиҳати маълум қилинди
Apple Inc. томонидан 21 март куни тақдим этилган янги 9.7 дюймли iPad Pro жаҳонда фойдаланилаётган 600 миллиондан зиёд PC-компьютерларининг ўрнини эгаллашни кўзлайди. Бу ҳақида Apple корпорациясининг маркетинг бўйича бош президенти Филипп Шиллер маълум қилган.
Мутахассислар Apple’нинг бу “даъвоси”га шубҳа билан қарашмоқда. Бунинг бош сабаблари сифатида iPad Pro’да сичқонча ва трекпад – қўл билан тегиб буйруқ бериш панелининг йўқлиги айтилмоқда.
2014 йилнинг январида Apple’нинг рақобатчилари томонидан намойиш этилган илк сенсор экранли ноутбуклар ҳақида компания салбий фикр билдирган эди. iPad Pro’да эса компания айнан ана шу сенсорли монитор технологиясини татбиқ қилган. Шу сабабли бўлса керак, гаджетда сичқонча ва трекпадни ўқиш функцияси жорий қилинмаган.
Аммо планшет $149 долларлик “Smart Keyboard” ақлли клавиатурани ҳамда $99 “Apple Pencil” ақлли қаламчани қўллаб-қувватлайди.
Сенсорли интерфейсда амалларни бажариш доим ҳам осон эмас. Айниқса, оддий матн танлаш учун ҳам дислейни силаш фойдаланувчини чарчатиб қўйиши мумкин.
Шу билан бирга, планшетдаги дастур яратувчилари учун керакли кўп жиҳатлар қисқартирилган.
Бу таблетга муносиб рақибларни ишлаб чиқараётган Google Inc. ҳамда Microsoft Corp., аллақачон компьютер ва планшет имкониятларини мужассам қилган гибрид гаджетларни ишлаб чиқармоқдалар.
Гарчи, жаҳонда десктоп компьютерлар савдоси нисбатан тушган бўлса ҳам, ҳануз уларга эҳтиёж юқори. Мисол учун, 2015 йилда 280 миллион дона компьютер сотилган.
Apple томонидан унинг гаджетларининг оммалашишига хизмат қилаётган иловаларни ишлаб чиқарувчиларига ҳам бир қатор малол келадиган чекловларнинг қўйилгани 2015 йилда iPad савдосининг 23 фоизга тушиб кетишининг яна бир сабабидир.
2015 йилнинг “Энг яхши мобиль планшет”и номи эса Жаҳон мобиль конгресси 2016 анжумани доирасида ўтказилган “Глобал Мобиль мукофот” тақдирлаш маросимида Microsoft Surface Pro 4’га топширилган эди.
