iPhone 10 ёшда: энг муваффақиятли ва энг омадсиз модел

Биласиз, илк айфон 2007 йилнинг 29 июнида сотувга чиқарилган. Бир пасда бунга ҳам 10 йил бўлибди. Apple корпорациясининг қимматбаҳо маҳсулотлари орасида ўз вақтида ҳам, ҳозир ҳам барча учун севимли бўлган iPhone моделлари бор. Уларни Wall Street'даги инвесторлардан тортиб, оддий одамлар ҳам фахр-ифтихор билан тутишади.

Таҳлилчилар ва иқтисодчилар учун смартфонларнинг дизайни ёки унинг платформа имкониятлари аҳамиятли эмас. Ўтган 10 йил давомида қайси iPhone "олма" компаниясига чинакам муваффақият келтирганини иқтисодчи таҳлилчилар ўрганиб чиқишди. Бунда энг кўп сотилганлик билан бирга, корпорация қимматли қоғозларининг нархини кўтариб юборган айфон моделига алоҳида эътибор қаратилди.

Бугунгача тақдим қилинган 7 та айфон авлоди ҳамда бир қанча моделлари орасида 2011 йилнинг 4 октябрида намойиш қилинган  iPhone 4s Apple смартфонлари мухлислари учун ҳам, компания инвесторлари учун ҳам энг қадрлиси бўлган экан. «Let’s Talk iPhone», яъни "келинг, айфонда гаплашайлик" шиори остида ўтган тақдимот илк маротаба Стив Жобс иштирокисиз ўтди. Стив ўша куни касалхонада умрининг сўнгги лаҳзаларини яшаётган эди.

iPhone 4s'да, биринчидан, шу вақтга қадар кўпчиликни қийнаб келган антенна муаммоси бартараф қилинган. Иккинчидан, «S» — Siri овозли ёрдамчиси илк маротаба жорий қилинган эди. Шу билан бирга, смартфонда 2 ядроли, частота тезлиги 1 ГГц бўлган Apple микропроцессори ўрнатилган. Қолаверса, 8 мегапикселли бош камера  Full HD-видео суратга олар эди. Оператив хотиранинг 512 МБ.га етгани, Bluetooth версии 4.0 технологияси кўпчилик учун катта янгилик бўлган.

Натижада, iPhone 4s яхши сотилиб, Apple акциялари баҳоси қимматлашиб боради. Жумладан, iPhone 4s тақдимотидан кейин ярим йил ўтиб компания қимматли қоғозларининг нархи 28% га ошади. Бир йил ичида компаниянинг даромади 69% га кўтарилади.

Шундай бўлса ҳам, Apple рейтингида акция баҳоларини оширишда iPhone 4s 2-ўринда турибди. Биринчи ўрин 2007 йилда тақдим қилинган илк айфонга насиб қилган. Илк айфон тақдимотидан 1 йил ўтиб корпорация акцияларининг баҳоси 119% га қимматлашган. Бу ўша давр учун энг яхши натижа эди.

Apple учун энг омадсиз келган айфон ҳам бор. Бу -- 2012 йилда тақдим қилинган iPhone 5. Гарчи, бу авлод айфонлари ўта юпқа корпусли ва енгил дизайнда ишлаб чиқарилган, "аждоди" каби 3.5 эмас, 4 дюймли экранга эга бўлган бўлса ҳам, компания кутилганидек фойда кўрмади. Тақдимотдан 6 ой ўтиб, Apple акциялари бор-йўғи 11 фоизга қимматлашган эди.

Гарчи, тезкор хотира 2 баробарга ошиб, 1 ГБ га етган бўлса-да,  iPhone 5 модели ҳам унча катта фойда келтирмади. Натижада, кейинги ярим йилликда Apple қимматли қоғозлари 43%, бир йил орасида эса 36% га арзонлашди.

Бу модел омадсизлигининг сабаблари дисплейнинг осон тирналиши, олинган суратлардаги бинафша ранг туслар, алюминий корпуснинг тез оқариши, аккумулятор қувватининг тезда тугаб қолиши билан боғлиқ.