iPhone 14 линияси жонли суратларда
Apple'нинг навбатдаги iPhone смартфонлари линияси ҳақида анчагина маълумотлар тарқалиб улгурди, лекин бу ҳали ҳаммаси эмас. Твиттер фойдаланувчиси ShrimpApplePro Хитойнинг Weibo ижтимоий тармоғида тарқатилган iPhone 14 линиясининг алюминийдан қилинган макети жонли суратларини тақдим қилди. Олдинги миш-мишларда, янги авлод iPhone қаторида Mini модел бўлмаслиги айтилган эди, бугунги сурат эса бу хабарларни тўлиқ тасдиқлайди.
Расмда биз фақат тўртта iPhone 14 моделини кўришимиз мумкин: иккита 6.7 дюймли оддий ва Pro модел, иккита 6.1 дюймли ўлчамдаги оддий ва Pro модел. Яна бир ўтказиб юбориш қийин бўлган нарса шуки, янги смартфоннинг Pro моделлари камераси таҳлилчи Минг-Чи Куо айтганидек, олдинги iPhone 13 Pro камера моделларидан 25-35 фоизга каттароқ бўлиб, улар 48 мегапикселли сенсорлар билан келиши мумкин.
Оддий 14 моделлари ҳали ҳам диагонал икки камера, иккала 14 Pro моделлари эса учлик камера билан таъминланган. Шунингдек, Weibo фойдаланувчисини ҳам iPhone 14 Pro моделлари олд камераси янгича дизайнда, Pro бўлмаган моделларнинг эса эскича тирқиш дизайнида қолишини тасдиқлайди.
