iPhone 14 Pro смартфонларидаги камера муаммоси кейинги ҳафта ҳал қилинади
Ижтимоий тармоқларда iPhone 14 Pro ва Pro Мах моделидаги Apple смартфонлари Instagram, TikTok ва Snapchat каби учинчи томон иловаларидан фойдаланилаётганда қурилма камера линзалари ўзидан-ўзида тебраниши ва натижада тасвирга олиб бўлмаётгани акс этган видеолар тарқалган эди. The Verge нашрининг Apple матбуот котиби Алекс Киршнер берган баёнотга асосланиб маълум қилишича, купертиноликлар "муаммодан хабардор ва тузатиш кейинги ҳафта чиқарилади".
Хатолик ҳақидаги хабарлар тарқалганида, муаммо айнан нимада эканлиги номаълум эди: айрим фойдаланувчилар камералар фақат учинчи томон иловаларидан фойдаланганда яхши ишламаётганлиги, Apple'нинг камера иловаси эса тўғри ишлаётганини айтишган. Бироқ, Apple берган баёнотга қараганда носозлик бошқа иловаларда эмас, балки, iPhone ва унинг API'ларида бўлиб, компания хатоликни тўғрилаш учун кейинги ҳафта дастурий таъминот янгиланишини чиқаради.
