iPhone 14 пулига битта Watch Ultra!

iPhone 14 пулига битта Watch Ultra!

Apple кечаги тадбирни янги Watch 8, Watch SE ҳамда Watch Ultra смарт соатларини тақдим этишдан бошлади. 

Apple Watch Ultra

Биринчи тақдимотда кўп вақтни олган Apple Watch Ultra'дан бошлаймиз. Ушбу смарт соатнинг ҳажми тақдимотдаги бошқа моделлардан анча катта. Apple учун бу янги смарт соат категория ҳисобланади. Хўш, у қандай хусусиятларга эга? 

Олд томондан Watch Ultra модели қолган Apple смарт соатларидан ажралиб туради. Қурилма 49 мм катталикдаги корпусга эга бўлиб, унга Apple смарт соатлари ичида энг катта ва энг ёрқин дисплей ўрнатилган. 

Корпус титандан ишланган, экран устига эса уни ҳимоя қилиш мақсадида сапфир кристал қоплама ўрнатилган. Apple'нинг айтишича, дисплей ёрқинлик даражаси 2000 нитга етиши мумкин. Албатта, бу ақл бовар қилмас кўрсаткич. 

Соатнинг чап томонида фавқулодда вазиятлар учун 86 десибелли сирена овозни чиқарувчи қўшимча динамик жойлашган, шунингдек, у ердан юқори контрастли тўқ сариқ рангга бўялган янги Action тугмаси ўрин олган. Ушбу тугма машқлар, компас йўналиш нуқталари ёки ортга йўлни (келган йўлдан қайтиб кетиш) бир зумда очиш учун мослаштирилиши мумкин.

Уй ҳамда ғилдираксимон тугма ўнг томонда жойлашган. Смарт соатда учта микрофон мавжуд, бу эса шамолли об-ҳавода ҳам овоз сифатини яхши етказиб беришга хизмат қилади. 

Қолган икки смарт соатдан каттароқ бўлганлиги учун Watch Ultra яхшироқ аккумулятор автономлигига эга. Агар always on display, автоматик жисмоний ҳаракатларни ёзиб олиш ҳамда юрак уришини доимий аниқлаб турадиган функциялар ёниқ бўлса, унинг қуввати 36 соатга, Ultra паст қувват режими ёқилганда эса 60 соатга етади. 

Чидамлилик жиҳатидан соат -20° C ёки 55° C даража совуқ ёки иссиқда ишлай олади. MiL-STD-810H стандартига эга ушбу смарт соат паст босим, юқори ҳарорат, паст ҳарорат, ёмғир, намлик, сувга шўнғиш, қум ва чанг, музлаш/эриш, зарба ва тебранишларга чидамли эканлиги айтимоқда.

Шунингдек, Watch Ultra'дан кайцерфинг ва вейкбординг каби сув спортлари учун ҳам фойдаланиш мумкин. У WR100 ва EN 13319 сертификатига эга, яъни бу сувга шўнғиш аксессуарлари учун тан олинган стандарт.

Қурилмада чуқурликни ўлчовчи функция бўлиб, у Чуқурлик иловаси билан биргаликда вақт, чуқурлик, сув ҳарорати, сув остидаги вақт ва максимал чуқурликни кўрсатади. Apple Watch Ultra'нинг уч хил: Trail Loop, Alpine Loop ва Ocean Band тасмалари бўлади. Уларнинг барчаси GPS ва уяли алоқани қўллаб-қувватлайди. Қурилмага олдиндан буюртма бериш кечадан бошланган. 23 сентябрь санасидан смарт соатлар ўз эгаларига жўнатила бошлайди. Нархи 799 доллар. 

Apple Watch Series 8

Ташқи кўринишидан янги модель ўтган йилги Watch Series 7 моделига ўхшайди. Бироқ Watch Series 8'га янги S8 чипи ўрнатилган. Шунингдек, гаджетга ҳарорат сенсори, ҳалокатни аниқлаш датчиклари ҳамда янги Ultra паст қувват режими қўшилган. 

Ҳарорат сенсори ҳар беш сонияда танадаги ҳароратни ўлчайди. Бунда иккита сенсор ёрдамга келади: бири соатнинг тагида, яъни у инсон терисига тегиб туради, иккинчиси эса диспей остида жойлашган. Бу билан сенсорлар танадаги 0.1° C ўзгаришни ҳам аниқлай олади. 

Ҳалокатни аниқлаш функцияси уч ўқли гироскопик сенсор ва янги юқори G-кучли акселерометр орқали ишлайди. Янги сенсор намуналари эски акселерометрга қараганда 4 баробар тезроқ ишлайди ва олд ёки ён зарба, орқа томондан тўқнашув ёки ағдарилишни ажрата олади. Ҳалокатни аниқлангандан сўнг, Watch Series 8 автоматик равишда фавқулодда хизматларга ва контактларга хабар беради.

Always on display, ҳаракатни автоматик кузатиш ва ҳалокатни аниқлаш функцияси ёниқ бўлса, смарт соатнинг қуввати 18 соатгача етади, паст қувват режимида автономлик вақти 36 соатгача ошади. 

Apple Watch 8 модели Lunar, Astronomy, Metropolitan ва Modular рангларда тақдим этилди. Корпус 100% қайта ишланган алюминийдан ясалган. Шунингдек, гаджетнинг уч хил пўлатдан ишланган турлари ҳам бор. Буюртма бериш кечадан бошланган, 16 сентябрдан етказиб бериш бошланади. Фақат GPS тизимига эга моделнинг нархи 399 доллар, GPS ҳамда уяли алоқага эга моделининг нархи эса 499 долларни ташкил қилади. 

Apple Watch SE 

Янги авлод Apple Watch SE ҳароратни аниқлаш сенсорига эга эмас, аммо Series 8 ҳамда Watch Ultra каби унда ҳалокатни аниқлаш функцияси мавжуд. Ушбу соатнинг корпуси ҳам 100 қайта ишланган алюминийдан ясалган. Унинг нархи 299 доллардан бошланади. 

ЎҚИНГ: Qualcomm иккита янги Snapdragon чипини тақдим этди 

Сайтимизнинг энг чиройли расмларини Инстаграмдаги саҳифамизда томоша қилинг!