iPhone 14 қаторидаги моделлар жонли суратда
Apple'нинг бу йилги iPhone 14 смартфонларини тақдим қилишига саноқли ойлар қолгани сари, Интернетда янги авлод айфони ҳақида маълумотлар ҳам кўпайиб бормоқда. Биз бир неча ҳафта олдин бўлажак iPhone 14 Pro Мах моделининг ўта реалистик макетини билан танишган эдик. Кеча эса бутун дунё ўргимчак тўрида iPhone 14 қаторидаги барча моделларнинг ёнма-ён қўйиб таққосланган макетларининг жонли суратлари тарқатилди.
Кўриш мумкинки, суратда фақат тўртта модел бор (Mini модели бўлмаслиги аллақачон маълум бўлган эди) ва улар фақат икки хил ўлчамда: iPhone 14 ва Мах 6.1 дюймли, iPhone 14 Pro ва Pro Мах 6.7 дюймли экран ўлчамига эга.
Шунингдек, Pro моделлари сезиларли даражадаги ўзгаришларга эга. Уларнинг олд экрандаги Face ID ва камера сенсорлари таблетка дори ва юмалоқ шаклдаги янгича кичик тирқишларга жойлаштирилган. Оддий 14 моделлари эса эски, катта қора тирқиш дизайнини сақлаб қолади.
Смартфонларнинг орқа томонига қарайдиган бўлсак, 14 ва 14 Мах моделлар аввалги iPhone қаторидаги каби диагонал жойлашган иккилик камерасига эга бўлиб, ялтироқ орқа панелга эга.
Ялтироқ бўлмаган, хира орқа панел билан таъминланган iPhone 14 Pro ва iPhone 14 Pro Мах эса 48MP бўлиши таҳмин қилинаётган каттароқ учлик камерага эга. Сенсорлар олдингисидан кўра янада каттароқ бўлиши айтилаётган эди ва билиниб турибдики, iPhone 14 Pro моделининг орқа камера ороли энига смартфоннинг ярмидан кўпини эгаллаган.
Таҳминларга кўра, iPhone 14 серияси куз фаслида, аниқроғи 13 сентабрда чиқарилиши кутилмоқда.
ЎҚИНГ: Apple тез кунда ўзининг виртуал реаллик қурилмасини тақдим қилиши мумкин!
