iPhone 15 базовий моделининг CAD рендерлари Apple сирларини ошкор қилди!
Apple'нинг iPhone 14 смартфонлари учун қизиқиш камайиб борар экан, янги авлод iPhone 15 сериясига оид миш-мишлар кўпайиб бормоқда. iPhone 15 Pro моделининг CAD рендерлари чиққанидан бир ҳафта ўтиб, 9То5Маc бу сафар қатордаги оддий модел – iPhone 15 CAD рендерларини улашди. Улар бўлажак флагманда бўладиган ўзгаришлар ҳақида маълумот беради.
Маълум бўлишича, iPhone 15 смартфонида бўладиган энг сезиларли анча йиллардан бери танқид қилиб келинадиган катта тирқиш ёхуд халқ тили билан айтган "чолка"нинг ўрнига динамик орол қўлланилиши бўлади. Ўтган йилги, яъни ҳозирги iPhone 14 сериясининг Pro моделларида тақдим қилинган ушбу функсия экран юқори марказидан бироз пастда жойлашган, Face ID ва камера сенсорларини ўз ичига олган узунчоқ овал шаклидаги тирқиш билан бирга ишлайди. Шундай қилиб, iPhone 15 сериясидаги барча моделлар динамик оролга эга бўлади ва бу аввал тарқатилган миш-мишларни тасдиқлайди.
Эътиборли ўзгаришларнинг яна бири шундаки, iPhone 15 ҳозирги бошланғич моделлардан кўра каттароқ – 6.2 дюймли дисплейга эга бўлади. Ҳозирча, дисплей ўлчами, янгиланиш тезлиги ва бошқалар ҳақида қўшимча маълумотлар йўқ, шундай экан, улар ҳақида бир нима деб бўлмайди.
CAD рендерларида аниқланган яна бир ўзгариш бу iPhone 15 ҳам, Pro моделлар каби USB Type-C портига эга бўлишидир. Таъкидлаш жоизки, бу мухлислар Apple'дан анча йиллардан бери сўраб келаётган эди, чунки USB-C компаниянинг ҳозирги Lightning технологиясидан анча тезроқ маълумотлар улашинуви ва тезкор зарядлашни қўллаб-қувватлайди.
Шунингдек, CAD рендерларга қараганда Apple базовий модел учун иккилик камера жойлашувини сақлаб қолади, учинчи камера ва LiDAR сенсори эса Pro моделлар учун эксклюзивлигича қоладиган кўринади.
Бошланғич iPhone 15 моделида бўлмайдиган яна бир хусусият – бу босимга сезгир тугмалардир. Эҳтимол, улар бу йил фақат Pro моделларга ўрнатилади. iPhone 15 эса худди олдинги смартфонлар каби жисмоний тугмаларга эга.
Албатта, ушбу рендерлар смартфонларнинг якуний ҳолати акс эттирмайди ва дизайн смартфонлар расман тақдим қилингунга қадар ўзгариши мумкин.
