iPhone 6s камераси етакчиликни Android-флагманларга бўшатиб берди
Бугунги кунда iPhone оммабоп смартфонлардан бири сифатида ўзининг камераси билан ҳам кўпчилик фойдаланувчилар меҳрини қозонган. Бироқ янги ишлаб чиқарилган iPhone 6s камераси экспертлар рейтингида нафақат Android бошқарувчидаги ускуналар, балки аввалги iPhone 6 ва 6 Plus`дан ҳам ортда қолмоқда.
Хусусан, DxO Mark мутахассислари iPhone 6s камерасини синовдан ўтказиб кўриб, Apple амалга оширган ишлар натижасидан қониқиш ҳосил қилишмади — смартфон бу борада рейтинг етакчиси Xperia Z5 флагманидан сезиларли даражада ортда қолди. Экспертлар 2015 йилда ишлаб чиқилган барча смартфонларни текшириб кўрар экан, уни Samsung Galaxy Note 4 дан ҳам кейинги ўринда қайд этишди. Якуний баҳолар iPhone 6s ва iPhone 6 учун қарийб бир хил бўлди.
Экспертларнинг таъкидлашича, смартфон камераси барча тажриба шароитларида ўзининг юқори тезлиги, автофокусининг аниқлиги билан ажралиб турган, керакли даражада ёритилган шароитларда оқ ранг баланси яхши сақланган. Бироқ энг асосий камчилик сифатида DxO Mark яхши ёритилмаган шароитларда у даражада тиниқ расмга олмаслиги, бино ичида рангларнинг кўланкаланиши, шунингдек, кўчада тасвирга олинганида сариқ ранг миқдори сезиларли ортгани айтиб ўтилган.
Бироқ булар смартфон ёмон суратга олади, дегани эмас. Шунчаки, мутахассислар ўз хулосасида бозорда яхши камерага эга смартфон олишни истаганлар учун бошқа мақбул маҳсулотлар ҳам бор эканини эслатиб ўтишди.
