iPhone 7’нинг Galaxy S8’да йўқ 10 та афзал жиҳати

Samsung Galaxy S8 ҳамда S8+ шубҳасизки, бугуннинг тилларда достон “қаҳрамон”лари. Бу эгизакларни ҳатто баъзи бир нашрлар «iPhone қотиллари» деб ҳам аташмоқда. Кореялик ишлаб чиқарувчи томонидан 3 йил тайёрланган ва ишчи номи “умид” бўлган Galaxy S8 компаниянинг Galaxy Note7 билан боғлиқ айбларини ювиши, смартфон бозоридаги обрў-нуфузини қайта тиклаши керак. Биз кечагина бу смартфонларнинг iPhone 7’дан кучли жиҳатларини алоҳида ёритган эдик. Ушбу материални ҳам ўқиб чиқишни тавсия қиламиз.

Samsung Galaxy S8 ҳамда S8+ қатор ютуқ ва инновациялар билан бирга, iPhone 7 билан солиштирганда, америкалик рақибидаги баъзи жиҳатлардан мосуво эканини ҳам кўрамиз. Қуйида бу камчиликлар тўғрисида маълумот берамиз.

1. 3D Touch технологияси

Apple смартфонларида фойдаланувчи қурилма билан ғайриоддий усулда “тиллашса” бўлади. Яъни, смартфон дисплейи унга босилган бармоқ изи зарбининг даражасига кўра, муайян топшириқни амалга оширади. 3D Touch технологияси Peek ва Pop номли функциялардан фойдаланиш учун айни муддао. iPhone’даги бу жиҳат ёрдамида фойдаланувчи турли илова ҳамда маълумотларни очмай туриб, улар билан ишлаш ва танишиш имконига эга бўлади.

2. Қўш камера

Samsung Galaxy S8’да қўш объективли бош камера татбиқ қилинмаган. Унинг бош камера модулида олинган суратлар 2016 йилдаги флагман смартфонларда олинган суратлардан катта фарқ қилмайди. Камера сиғими ҳам 12 мегапикселли, Galaxy S7 каби, у ҳам Dual Pixel технологияси билан таъминланган. Apple смартфонларининг қўш объективли бош камераси эса оптик яқинлаштириш функцияси билан таъминланган. Яъни, улар ёрдамида объектни тасвир сифатини туширмаган ҳолда яқинлаштириб, суратга олиш имконияти мавжуд. Шунингдек, айфондаги портрет режимида олинган суратнинг сифати мисоли профессионал фотокамералар олган манзара сифатига тенг.

3. Пишиқ корпус

iPhone 7 айни пайтда смартфон бозоридаги энг самарали, энг ҳимояланган ва энг оммалашган гаджети. Қолаверса, у ўзининг жуда пишиқ корпуси билан ҳам мақтаниши мумкин. Samsung Galaxy S8 ҳамда S8+ каби пешқадам Android-аппаратлар эса, шиша корпусга эга ва осон синиб кетиши ҳеч гап.

4. Юпқа ва енгил

Ўлчам нуқтаи назаридан, 4,7 дюймли iPhone 7 рақибига қараганда ихчам – 138,3 x 67,1 x 7,1 мм бўлиб, Galaxy S8’да бу кўрсаткич — 148,9 x 68,1 x 8,0 мм.ни ташкил қилади.  Жанубий кореялик аппарат корпуси қалинлашиб, юпқалик масаласида iPhone’дан ютқазиб қўяди. Apple ва Samsung флагман смартфонларининг вазнидаги фарқ ҳам юқори – 143 ва 155 грамм. Galaxy S8+ ўлчамлари — 159,5 x 73,4 x 8,1 мм бўлиб,  аппарат 173 грамм тош босади. iPhone 7 Plus – 158,2 x 77,9 x 7,3 мм, вазни эса 188 грамм.

5. iOS

Барча айфонлар каби, iPhone 7 ўзининг операцион тизими билан Galaxy S8’га бемалол зарба бера олади. Боиси, Apple смартфони ҳимояланган ва тезкор фаолиятни кафолатлайди. iOS ахборот хуружлари, вируслардан ҳимояланиш ва оддий, яъни тушунарлилик бўйича жаҳондаги етакчи операцион тизим. Кореялик Android-смартфон эса бир қатор жиҳатлар, жумладан AirDrop, AirPlay, iTunes, Find My iPhone каби илғор иловаларга эга эмас. Қолаверса, iPhone 7 смартфони учун сифатли ва ишончли иловаларни таклиф қилувчи App Store интернет дўконининг эшиклари ҳам очиқ. Шунингдек, iOS’да аввалдан ўрнатилган операторлик иловалари ҳам мавжуд эмас. Galaxy S8’даги бундай иловаларни эса қийинчилик билан ўчириб ташлаш мумкин. Бўлмаса, хотирада жойни эгаллаб ётаверади.

6. Стерео-динамиклар

iPhone 7 ҳамда iPhone 7 Plus ўзларида ўрнатилган сифатли овоз узатувчи стерео динамиклари билан фахрлансалар арзийди. Galaxy S8 ва Galaxy S8+ эса бор-йўғи биттагина овоз узатувчи карнай билан таъминланган. Apple  эса сўнгги айфонларининг энг фаол динамикларидан бирини корпуснинг қуйи, бошқасини устки қисмига жойлаштирган. Бу энг оригинал ечим.

7. Бармоқ излари сканери олд панелда

Galaxy S8’нинг қулайлик ва дизайн ечими билан боғлиқ энг кўп танқид олинган жиҳат, бу – биометрик модулнинг орқа панелга, устига-устак камера билан ёнма-ён жойлаштирилгани бўлди. Ҳар гал бармоқни сканер қилиш учун смартфонни ўгириш ва бармоқни тутиш керак бўлади. Дисплейни кенгайтириш учун шошиб қилинган иш бир оз ўхшамагандек. iPhone 7’да эса бу сканер модули Touch ID дейилади ва олд панелдан, экран остидан жой олган. Бу эса “олма” флагмани фойдаланувчисига стол устидаги смартфонни қўлга олмасдан туриб ҳам блокировкадан чиқариш имконини беради. Қолаверса, Touch ID орқали электрон харидларни ҳам амалга ошириш мумкин.

8. 256 ГБ хотира

Apple сўнгги iPhone’ни 3 хотирага эга талқинларда тақдим этмоқда. Яъни, 32, 128 ва 256 ГБ хотира сиғимида. Samsung эса Galaxy S8’га 64 ГБ доимий хотира ўрнатган.

9. Mute тугмаси

iPhone 7’нинг Galaxy S8’дан яна бир яққол устунлиги —  ундаги Mute клавишидир. Унинг ёрдамида овозни зарур вазиятда тез ва осон ўчириб қўйиш мумкин.

10. iPhone 2 ой ўтиб қадр-қимматини йўқотмайди

Apple смартфонларининг яна бир муҳим жиҳати — унинг қадри доимо юқори. Боиси, компания нарх масаласида қатъий тамойилга эга ва сотувга чиққанидан сўнг 1 йил ўтиб ҳам, айфон нархи ўзгармайди. Жумладан, 2 йил аввалги iPhone нархи ҳануз ўша-ўша қолган бўлади. Бу ҳам iPhone деган бренднинг номига хизмат қилмоқда.