iPhone 7’нинг номи маълум бўлди, iPhone 8’нинг сурати эълон қилинди
Шу вақтга қадар “iPhone 7” номи билан аталаётган янги айфоннинг асл номи iPhone 6SE эканлиги тўғрисида Германиянинг Apfelpage.de нашри хитойлик ишончли манбаага суяниб хабар қилмоқда. Манбаанинг маълум қилишича, Apple Хитойдаги заводлардан бирига ‘iPhone 6SE’ бренди туширилган қутиларни тайёрлаш учун буюртма берган.
Гап шундаки, айфоннинг навбатдаги вакили дизайн жиҳатдан компаниянинг сўнгги гаджети — iPhone 6s’дан у қадар ҳам фарқ қилмайди. Шу сабабли, анъанага кўра унга “SE” (special edition), яъни “махсус талқин” қўшимчаси қўшилса ажаб эмас. Компания 2016 йилнинг 21 мартида намойиш қилган iPhone SE ҳам ташқи кўриниш ва дизайни жиҳатдан iPhone 5s’ни “меросхўри” эди. ‘S’ талқинда асомий эътибор ички янгиланишларга қаратилади.
VentureBeat инсайдери мухбири Эван Бласснинг маълум қилишича, келаётган iPhone тақдимоти 16 сентябрь куни, янги iPad, Apple Watch қурилмалари ва iOS 10 операцион тизими билан бирга намойиш этилади.
iPhone’нинг кейинги вакиллари Apple’нинг A10 процессорига ҳамда қувват сиғими каттароқ бўлган аккумулятор билан таъминланади.
Маълумотларга қараганда, Apple қурилма билан боғлиқ шов-шувли ўзгаришларни компанияга омад олиб келган айфон қурилмасининг 10 йиллиги нишонланиши кутилаётган 2017 йилга асраб турибди.
Тамоман янгича дизайн ва жиҳатларга эга iPhone 8 симсиз қувват олиш функцияси, шиша қобиқ, металл ромлар, корпуссиз — соҳиллари туташ дисплей, AMOLED платформасида ишлайдиган 4K экранга эга бўлади. Дисплейда Touch ID тизими татбиқ этилиб, “Бош тугма” виртуал кўринишга ўтади.
