iPhone 7 ва iPhone 7 Plus’ларда яна бир жиддий муаммо чиқди

  •   DiMaX
  •  3232
  •  02.05.2017 13:25

iPhone 7 ва iPhone 7 Plus’ларда яна бир жиддий муаммо чиқди

Apple’нинг сўнгги чиққан флагман смартфони буткул янгича корпусдан ва бошқа янгиликлардан ташқари, янгича «Home» тугмачасига ҳам эга. Бу жиҳоз ҳар жиҳатдан янгича: ишлаш принципи олдинги авлод iPhone’лардагидек эмас, сезиш тезлиги ҳам юқори. Бироқ бу афзалликлар ортида шундай бир жиддий нуқсон ҳам борки, ҳар бир iPhone 7 ёки iPhone 7 Plus эгаси унга дуч келиши мумкин.

Гап шундаки, янги авлод iPhone’лардаги «Home» тугмачаси ўта мўрт материалдан қилинган. AppleInsider.ru сайтига ModMac сервис марказидан хабар қилишларича, тугмача механик тегинишларга жуда таъсирчан. Мутахассисларнинг сўзларига кўра, ModMac’га айнан «Home» тугмачаси синганлиги туфайли олиб келинган смартфонлар жуда кўп. Бу нуқсондан жабр кўрганлар шунчалик кўпки, алмаштириб бериш учун сервисга смартфонларнинг янги серияси келиб улгурмасидан, тугмачаси синганлигидан шикоят қилиб келганлар навбати тизилиб қолмоқда.

Мана, масалан, 128 ГБ ички хотирага эга, «жилодор қора» (Jet Black) рангли iPhone 7 модели. Эгасининг айтишича, унинг тугмачаси нега синганлиги умуман тушунарсиз: телефон сумка ичида ётган бўлган, уни қўлга олиб қараса – «Home» тугмачаси синган ва ўта қизиб кетган экан.

ModMac’дагилар айнан шундай ҳажмли хотирага эга, шунақа моделдаги iPhone топиб, тугмачани алмаштириб беришган, аммо қайта прошивка қилишса ҳам тугмача ишламаган. Бироқ ундаги сенсор хатолик сабабли ўз-ўзидан мунтазам иш ҳолатида турган ва шу боис телефон батареясининг қуввати тез тугаган. Тугмачанинг ўзи ҳам бармоқни куйдирадиган даражада қизиб кетган.

Бу каби ҳолатлар кун сайин кўпроқ учраяпти ва мазкур муаммо фақат қурилмани тўлиқ алмаштириш йўли билангина буткул ҳал этиляпти экан. Айни дамда ModMac ушбу муаммони ҳал этишнинг муқобил йўлларини излаш билан банд, дейилади хабарда.

Сайтнинг мурожаатига жавобан Apple’дан маълум қилишларича, компания мазкур масала билан шуғулланмайди ва бу борада сервис марказларига мурожаат этиш лозим. Расмий сервис марказларида эса, «бундай ҳолатлар кафолат доирасига кирмайди, чунки механик таъсир бўлган; яна тугмачанинг ўзи эмас, балки бутунича смартфоннинг ўзи алмаштирилади», дейишмоқда.

Шундай экан, iPhone 7 ёки iPhone 7 Plus смартфонларининг нафақат корпус сиртқи қопламасини, балки «Home» тугмачасини ҳам авайлашга тўғри келади. Ушбу қурилмаларнинг бошқа муаммолари ҳақида мана бу мақоламизда ҳам ёзганмиз.

Эслатиб ўтамиз, пойтахтимиздаги «Малика» савдо марказида «жилодор қора» (Jet Black) рангли iPhone нархлари бошқаларига нисбатан сал юқорироқ. Бу рангдаги смартфон эгаларига биз уларни ғилоф билан ишлатишни тавсия қилган бўлар эдик.

Хабарларни тез ва осон ўқиш учун Андроид иловамизни сақлаб олинг.