iPhone Android'нинг муҳим жиҳатини ўзлаштиради
KGI компаниясининг таниқли эксперти ва таҳлилчиси Минг-Чи Куо бугун ўзининг навбатдаги қарашлари билан ўртоқлашди. Apple бу йил ишлаб чиқарадиган смартфонларга дахлдор янгиликда қайд этилишича, бу йилги iPhone девайслари иккита сим картани қўллаб-қувватлайди.
Унинг сўзларига кўра, компания жорий йилда 6,1 дюймли икки моделни ишлаб чиқаради. Улардан бири иккита SIM-картада ишлашга мўлжалланган бўлади. Таҳлилчи мазкур моделнинг 650-750 АҚШ долларига баҳоланишини ҳам маълум қилган.
Ўқинг: Telegram'га VPN орқали кириш қонунийми? Роскомнадзор жавоб берди.
«6,1 дюймли ва LCD-экранли, шунингдек иккита сим картани қўллаб-қувватлайдиган iPhone қурилмасининг ишлаб чиқарилиши бу йил унинг савдосининг янада яхшиланишига ҳисса қўшади. Бундай моделлар нахр-наво диапазонини кенгайтириш, шунингдек икки сим картали смартфонларни хуш кўрадиган Хитойда муваффақият қозонишни таъминлайди», – дейди Куо.
Шу билан бирга, таҳлилчининг сўзларига қараганда 6,5 дюймли ҳамда OLED матрицали дисплейга эга бўладиган энг қиммат iPhone ҳам бу йил иккита SIM-картада ишлаш имконига эга бўлади. Экран диагонали 5,8 дюймли бошланғич модел эса бундай функция билан таъминланмайди.
Минг-Чи Куо қайд этишича, икки сим картали iPhone ҳақидаги маълумот яқиндагина аниқ бўлган. Шунинг учун уни ишлаб чиқариш ҳам бир оз вақтни олади. Intel ва Qualcomm процессорлари ўрнатилиши кутилаётган бундай гаджетлар савдога бошқаларидан бир оз кеч чиқарилиши мумкин.
Инсайдерларнинг ёзишларича, 6.5 дюймли, OLED дисплейли iPhone 1099 АҚШ доллардан, айфоннинг 5.8 дюймли ва OLED-дисплейли талқини эса 999 АҚШ долларидан ҳамда 6.1 дюймли ва LCD-дисплейли модел 750 АҚШ долларидан сотувга чиқарилади.
