iPhone билан рақобатлашиш учун Galaxy Note 9’ни муддатидан олдин чиқаришмоқчи
Samsung компанияси Galaxy Note туркумига мансуб фаблетларининг тақдимот тадбирларини одатда август ойи сўнгида ўтказар эди. Аммо бу йил кучли рақобат туфайли у мазкур анъанадан чекиниб, Note 9 моделини сал олдинроқ намойиш этиши мумкин.
ЎҚИНГ: Samsung’нинг бўлажак флагмани – Galaxy Note 9 хусусиятлари ошкор этилди
Жанубий Кореянинг The Investor газетаси бу ҳақда Samsung компаниясининг бутловчи қисмларни етказиб берувчиларидаги ўз манбаларига таяниб хабар қилган. Унга кўра, жорий йилдаги Galaxy Note 9 смартфони июль ойининг охирлари ёки август бошларида тақдим этилиши мумкин. Нашр суҳбатдошларининг берган маълумотларига кўра, Samsung аллақачон бу фаблетининг лойиҳалаштириш ишларини якунлаган ва етказиб берувчилар оммавий ишлаб чиқаришни бошлашга тайёр туришларини талаб қилмоқда.
Жанубий кореялик гигант, биринчи ўринда, ўзининг «ашаддий рақиби» – Apple смартфонлари билан бўладиган рақобатни ўйлаяпти. Яъни, у одатда кузда ўтказиладиган iPhone тақдимот маросимидан имкон қадар эртароқ Galaxy Note 9’ни намойиш этиб, савдога чиқариб, бозордан кўпроқ улуш «тортиб олиш»ни кўзлаяпти. Эҳтимол, анча эртадан фаблетни бенчмаркда синаб кўришганининг сабаби ҳам шундадир.
ЎҚИНГ: Samsung ҳам шошиб қолди: Galaxy Note 9 аллақачон бенчмаркда «кўринди»!
Аммо бу шошилишнинг салбий томони ҳам бор, дейилади нашр хабарида. Samsung Electronics ўз фаблетининг тақдимоти ва ишлаб чиқарилишини тезлаштириш учун вақт тиғизлик қилади. Натижада Galaxy Note 9’да жорий этилиши кутилаётган айрим янги технологиялардан воз кечишга тўғри келади. Масалан, ҳалигача аниқ ҳал этилмаган масала – фаблетнинг бармоқ изи сканерини дисплейнинг ўзига интеграциялаш бекор қилиниши мумкин.
Galaxy Note 9 моделининг техник таъминоти асосини, Geekbench маълумотига кўра, саккиз ядроли Snapdragon 845 чипсети ҳамда 6 гигабайтлик тезкор хотира ташкил этади. Унинг дисплейи томонларининг ўзаро нисбати аввалгича қолади, аммо экраннинг ўлчами йириклаштирилади. Galaxy Note 8 моделида дисплей диагонали 6,32 дюймни ташкил этган бўлса, тўққизинчи авлод фаблетда у 6,38 дюймгача оширилади.
ЎҚИНГ: Galaxy Note 9: уч модулли камера ва сканерли дисплейга эга флагманни томоша қилинг!
