iPhone’даги ‘i’ нимани англатишини кўпчилик билмас экан

Эҳтимол, ахборот технологиялари асрида ‘i’ ҳарфи энг оммабоп ва машҳур белги бўлса керак. Айниқса, у жаҳоннинг энг яхши смартфон бренди олдида ишлатилса. “iPhone” сўзининг илк ҳарфи, яъни “ай” аслида инглизча “internet” сўзининг қисқартмаси бўлиб, унинг тарихи қуйидагича.

1998 йил Apple’нинг ахборот технологиялари саноатидаги даврини бошлаб берган “iMac” компьютери намойиш этилди.

iMac’ни тақдим қилар экан, компания раҳбари Стив Жобс харидорларнинг компьютер харид қилишдан бош ва биринчи рақамли мақсади интернетдан фойдаланиш эканини айтади. Ўша вақтларда жадал оммалашаётган интернетдан фойдаланиш қулайлиги компьютерлар рекламасининг муҳим қисмига айланган эди.

“Macintosh’да интернетдан фойдаланиш янада тез ва осон. Бу айнан интернетдан фойдаланишга мўлжалланган маҳсулот”, деган эди Стив Жобс.

Аммо шу билан бирга, ўша кунги тақдимотда “i”нинг яна қатор, хусусан “individual” (ўзига хос ёки шахсий), “instruct” (таълим берувчи), “inform” (бохабар қилувчи), “inspire” (илҳомлантирувчи) каби ижобий сифатлар билан боғлаш мумкинлиги ҳам айтилган эди.

Илк айфон 2007 йилнинг 9 январида MacWorld Expo кўргазмасида эълон қилинган. 2008 йилда, яъни савдога чиққан йили iPhone жаҳоннинг энг яхши мобиль технология қурилмаси сифатида эътироф этилади. Бугунги кунга қадар айфоннинг 12 та модели тақдим қилинган.