iPhone Microsoft’га бўлган кучли нафратнинг меваси бўлган
iOS операцион тизимининг дастурчиларидан бири Скотт Форсталл 2012 йилда Apple корпорациясидан кетгач, илк маротаба куни кеча Калифорния компьютер тарихи музейининг теле-шоусида интервю берди. Apple’нинг собиқ топ-менеджерларидан бири iPhone ва iPad гаджетларининг яратилиш тарихи хусусида батафсил тўхталди.
Форсталлнинг сўзларига кўра, iPhone смартфонининг ишлаб чиқарилиши, аниқроғи айфон қурилмасининг концепцияси Стив Жобснинг Microsoft корпорациясида хизмат қилган бир мансабдор ходимга нисбатан бўлган нафратининг мевасидир. Дастурчи гап айнан ким ҳақида бораётганига ойдинлик киритмаган.
“Стив Жобс ҳар гал иш юзасидан ўша шахс билан гаплашгач, зардаси қайнар, дарғазаб кайфиятга тушар эди”, деб эслайди Apple’нинг собиқ ходими. Унинг сўзларига кўра, Стив ҳамда Microsoft’даги ўша мансабдорнинг турмуш ўртоқлари ҳам яқин дугоналар бўлишган. Стивда бир вақтлар содир бўлган муаллифлик ҳуқуқи билан боғлиқ тортишувлар сабаб Microsoft’га нисбатан нафрат сақланиб қолган ва тадбиркор ўзига хос гаджет яратиб, рақибидан кучли эканини кўрсатиб қўйишга уринган.
Суҳбатда қайд этилишича, Microsoft мутахассиси планшетларни махсус стилуслари билан ишлаб чиқариш зарурлигини, шунда янаям бу гаджетлар оммалашишини айтса, Жобс бу фикрга қарши чиққан ва инсонга Яратган томонидан 10 та стилус қаламчалари (бармоқлар) берилганини, дисплей айнан шунга мослшаби тараққий этиши зарурлигини айтган. Уларнинг электроника бўйича тасаввурлари доимо зид бўлган.
iPad’ни ишлаб чиқариш iPhone’гача бошлаб юборилган бўлган. Илк айфон режадагидан 3 йил аввал — 2007 йилда тақдим қилинган. Жобс бир нечта нуқтага берилган буйруқни амалга оширадиган илк планшет дисплейини яратган. Бундай дисплейда, мисол учун, суратни очиш ва унинг турли бурчакларини тортиб катталаштириш мумкин бўлган. Бунда планшет фақатгина бармоқлар ёрдамида бошқарилган. Жобснинг фикрича, сенсор экран албатта қўлда бошқарилиши керак.
Apple асосчиси ҳаётдан кўз юмгач, компания iPad учун Pencil «ақлли» стилусини тақдим қилган. Бу гаджет рассом ва дизайнерлар учун рақамли қалам вазифасини бажаради.
