iPhone SE 2 смартфонини, ниҳоят, «жонли» видеода ҳам кўрсатишди!
Apple корпорацияси тайёрлаётган ихчам айфон – iPhone SE моделининг иккинчи авлоди «жонли» суратини куни кечагина эълон қилган эдик. Энди шу қурилма «жонли» акс эттирилган видеолавҳа ҳам интернетда тарқалди.
Аниқроғи – ўша расмлар аслида мана шу видеодан олинган экан.
ЎҚИНГ: Ниҳоят, iPhone SE 2’нинг илк «жонли» суратлари чиқди!
Таъкидлаш керакки, iPhone SE 2 тасвирланган видео ҳам «хитойча Twitter» саналмиш Weibo ижтимоий тармоғида эълон қилинган. Ушбу маълумотни тарқатган манбага кўра, унда iPhone SE 2’нинг якуний прототипи акс эттирилган.
Видеороликдаги смартфон дизайни ва ўлчамларига кўра олдинги авлод – оригинал iPhone SE моделидан деярли фарқланмайди. Ягона жиддий ўзгариш – корпуснинг орқа панели алюминийдан эмас, балки шишадан ишланганлигидир. Бунинг асосий сабаби – iPhone SE 2 моделига ҳам симсиз қувватлаш технологияси жорий этилишидир.
Хуллас, видеолавҳани бирга кўрамиз:
Айни дамда бу тасвирлардаги смартфон чиндан ҳам iPhone SE 2 (2018) модели экани борасида қатъий бир нарса дейиш қийин. Олдинроқ «сизиб чиққан» хабарларга кўра, Apple бу янги айфоннинг орқа қопқоғини шишадан ишлашдан ташқари, уни 3,5 миллиметрлик аудиотирқишдан маҳрум этиши керак эди. Расмда ва видеода кўрсатилган смартфонда эса ушбу қулоқчин тирқиши сақланиб қолган.
Агар ҳозиргача тарқалган миш-мишлар рост бўлиб чиқса, iPhone SE 2 моделини Apple шу йилнинг май ёки июнь ойида – WWDC 2018 анжуманида тақдим этиши кутилмоқда. Купертинолик техногигантнинг савдога чиқарилган кўплаб моделлардаги айфонлари эса юртимизда ҳам сотувга қўйилган.
