iPhone сотиб ололмайсизми? Унда ижарага олинг!
Apple'нинг iPhone смартфонлари дунёдаги энг зўр смартфонлардан бири ва шу билан бирга улар жуда қиммат ҳам, шундай экан ҳар ким ҳам уларни сотиб ололмайди. Bloomberg нашрининг хабар беришича, купертинолик компания ўзининг iPhone ва бошқа қурилмаларини маълум нархда ойлик ижарага бериш обунаси устида ишламоқда. Бу худди Apple Music ёки Apple TV каби обуналарга уланишдек бўлади.
Ушбу хизмат Apple'нинг автоматик равишда такрорланадиган сотувидаги энг катта ўзгариш бўлиб, фойдаланувчиларга рақамли хизматлардан кўра биринчи марта қурилмаларга обуна бўлиш имконини беради. Агар компания бу хизматни ишга туширса, албатта, фойдаланувчилар ўзларининг ойлик қурилмаларига фақат битта Apple ID аккаунтлари билан уланишлари керак бўлади ва бу аккаунт бошқа Apple хизматлари учун ҳам ишлатилади. Шунингдек, смартфон обунасига қўшиб компаниянинг яна бир пуллик обуна хизмати: iCloud булутли хотирасига обуна ёки Apple Music обунаси ёки бошқа обуна хизмати мажбурий қўшиб берилиши ҳам мумкин.
Таъкидлаш керакки, бу обуна хизмати бўлиб-бўлиб тўлаш дастуридан фарқ қилади ва ойлик тўлов 12 ёки 24 ойга бўлинган қурилма нархи бўлмайди. Аксинча, бу ҳали нархи аниқланмаган ойлик тўлов бўлиб, фойдаланувчи қайси қурилмани танлашига боғлиқ. Компания ҳар йили ўз қурилмаларининг янги авлодини чиқарганида, ойлик қурилмалар фойдаланувчилари эскисидан янгисига ҳам ўтишлари мумкин бўлади.
Apple лойиҳа устида ҳали ҳам ишлар олиб бормоқда ва у шу йилнинг охирида чиқиши ёки 2023 йилга кечиктирилиши ёки умуман чиқмаслиги ҳам мумкин.
