iPhone учун “ёнаётган” чехол яратилди
Hi-tech.mail.ru сайтининг ёзишича, UNIQFIND компанияси iPhone моделлари учун Samsung Galaxy Note 7’нинг ёнган орқа ва олд панели акс эттирилган ҳимоя чехолини ишлаб чиқди. Чехолда ҳатто куйиб кетган Samsung логотипининг бир қисмини ҳам кўриш мумкин.
Чехолни олд стикер билан биргаликда 35 долларга харид қилиш мумкин. Телефоннинг ёниши акс этган стикернинг ўзи эса 25 долларга сотувга чиқарилади. iPhone учун мазкур “ёнаётган” чехоллар ноябрь ойида савдо расталарига етказилади. Аксессуар Apple iPhone 5 ва ундан янгироқ моделларга мўлжалланган.
Энг қизиғи, мазкур чехол тақдим этилгандан кейин, баъзи хабарларга кўра австралиялик фуқаронинг автомобили iPhone 7 сабаб ёниб кетган. Бу борада Phonearena нашри хабар тарқатган.
Эслатиб ўтамиз, Samsung Electronics компанияси 11 октябрь куни Galaxy Note 7 смартфонларини ишлаб чиқаришни тўхтатиши борасида расман маълум қилган эди.
