iPhone ва iPad’ларга сунъий онг учун алоҳида чип яратилмоқда

  •   DiMaX
  •  963
  •  29.05.2017 16:46

iPhone ва iPad’ларга сунъий онг учун алоҳида чип яратилмоқда

iPhone 5s ва iPad Air моделларидан бошлаб, Apple ўз смартфонлари ва планшетларига ҳаракат датчикларидан олинган маълумотларни қайта ишлаш учун қўшимча процессор қўйиб келмоқда. Компаниянинг бўлажак қурилмаларида эса, сунъий онг билан боғлиқ вазифаларнинг тезкорликда бажарилишини таъминлаш учун яна битта қўшимча чип пайдо бўлиши мумкин. Мазкур ишланма ҳозирча Apple Neural Engine кодли номи билан маълум, деб ёзади Bloomberg.

Манбанинг хабар беришича, Neural Engine фотосуратлардаги юзларни таниб олиш, нутқни таҳлил этиш, клавиатурада теришда сўзларни олдиндан тахмин қилиш каби функциялар учун масъул бўлади. Ҳозирда эса бу каби операцияларнинг бажарилиши процессор ва график тезлатгичнинг зиммасида. Янги микросхема уларни муайян юкламадан халос этиб, смартфон ёки планшетнинг қувват сарфлашини ҳам маълум даражада тежайди.

Apple бу технологиясини iPhone, iPad ва бошқа гаджетларига интеграциялаштирмоқчи. Тахминларга кўра, чет илова ишлаб чиқувчилар ҳам ўз иловаларининг фаолиятида бу чипнинг хизматидан фойдаланишлари мумкин бўлади.

Хабарда айтилишича, компания аллақачон Neural Engine чипига эга iPhone прототипларини синовдан ўтказа бошлаган. Аммо улар 2017 йилги кутилаётган моделларга жорий этиладими ё йўқми – буниси қоронғу. Эҳтимол, янги ишланмани жорий йилнинг 5–9 июнь кунлари Сан-Хоседа ўтказиладиган WWDC 17 конференциясида тақдим этишар.

Сайт янгиликларидан доимий хабардор бўлиш учун Телеграм каналимизга қўшилинг!