iPhone7 учун эҳтиёт қисмлар Apple’га 220 долларга тушмоқда

iPhone7’нинг 32 ГБли стандарт модели айни пайтда оператор билан тузилган шартномасиз тахминан 650 АҚШ долларида сотилади. Бироқ IHS Markit аналитикларининг ҳисобларига кўра, ушбу моделнинг эҳтиёт қисмлари компанияга анча арзонга, тахминан 220 долларга тушмоқда. Бироқ тайёр маҳсулотни ишлаб чиқариш учун эҳтиёт қисмлардан ташқари яна бир қатор (ишчи кучи, етказиб бериш, кафолат хизмати ва бошқ.) харажатлар мавжудлигини ёддан чиқармаслик керак.

Эксперларнинг таъкидлашича, қурилмадаги энг қиммат компонент экран ҳисобланади. Компания ҳар битта экран учун 43 доллар пул сарфлайди, шунингдек, компанияга Intel симсиз модеми 34 доллар, Apple A10 процессори 26,9 доллар, камера 19,9 доллар, хотира чипи эса 16, 4 долларга тушмоқда. Бироқ юқорида келтирилган компонентлар учун Apple жуда катта ҳажмдаги буюртма сабаб сезиларли даражада чегирма олганини ҳам эътибордан четда қолдирмаслик керак.