iQOO Z1 5G тақдим этилди: флагман процессорли илк смартфон – атиги 309 доллардан!
Яқиндагина MediaTek компанияси ўзининг Dimensity 1000 Plus русумли флагман процессорини тақдим этган. Унинг базасидаги илк 5G-смартфонни эса Vivo компаниясининг ўйинбоп қурилмаларга мослашган iQOO бренди тайёрлаган ва у расмий тақдимотдан аввал сотувга ҳам чиққан.
ЎҚИНГ: «Qualcomm, нарироқ сурил!» – Samsung ҳам арзон 5G-смартфонлар учун процессор тайёрлаяпти
Vivo кеча – 19 май куни IQOO Z1 5G русумли ушбу флагманини намойиш этди. Биринчи бор ушбу смартфонда қўлланган янги чипсетнинг илғор хусусиятларидан бири – у бир вақтнинг ўзида 5G тармоғида ишловчи иккита SIM-картани қўллаб-қувватлайди. Ҳозиргача энг кучли чипсоз – Qualcomm ҳам, Samsung ёки Huawei ҳам бунақа мобил процессор яратган эмас.
iQOO Z1 5G моделига қайтадиган бўлсак, унинг ташқи кўриниши «Ғалаба учун туғилган» дея мақталган iQOO Neo 3 5G смартфонига ўхшаш. Қурилманинг тезкор хотираси LPDDR4X турига мансуб бўлиб, 6/8 ГБлик вариантларда тақдим этилади. Доимий хотира чиплари эса UFS 3.1 тоифали, ҳажмига кўра 128/256 гигабайтлик.
ЎҚИНГ: iQOO Neo 3 чиқди: энг кучли процессорли энг арзон 5G-флагман!
Янги смартфонни 6.57 дюймлик, FHD+ форматидаги IPS-дисплей билан таъминлашган. Кадр янгиланиш частотаси 144 герцни ташкил этувчи экраннинг юқори ўнг бурчагида 16 мегапикселлик селфи-камера тирқиши мавжуд.
iQOO Z1 5G бош камераси бўлса уч модулли ва унда асосий сенсор сифатида 48 мегапикселлик Sony IMX582 қўлланган. Унга ўта кенг бурчакли объективга эга 8 МПлик датчик ҳамда 2 МПлик макрокамера ҳамроҳлик қилади. Смартфоннинг бош камераси Hyper HDR технологиясига, инсон кўзини кузатиш функциясига ва тунги режимга эга.
ЎҚИНГ: ТОП-10: Энг кучли ҳамёнбоп смартфонлар (AnTuTu рейтинги, 2020 йил апрель)
iQOO Z1 5G флагманини Vivo энг янги – Wi-Fi 6, шунингдек NFC ва GPS модуллари билан жиҳозлаган. Корпусида қулоқчин учун 3,5 миллиметрлик стандарт аудиотирқиш ҳамда стереодинамик ҳам жойланган. Қурилманинг 4500 мА/соатлик аккумулятори 44 ваттлик технология бўйича тезкор қувватланади. Бармоқ изи сенсори эса корпуснинг ўнг қиррасига ўрнатилган.
Мазкур девайс энг янги – Android 10 операцион тизим талқини базасидаги iQOO UI 1.0 график қобиғи билан таъминланган. Vivo унинг учун қуйидагича нархлар белгилаган:
iQOO Z1 5G 6/128 ГБ – $309
iQOO Z1 5G 8/128 ГБ – $351
iQOO Z1 5G 8/256 ГБ – $394
Мазкур смартфон ўз ватанида 1 июндан сотила бошлайди, лекин Хитойдан ташқаридаги бозорларга чиқиши ҳақида ҳозирча маълумот йўқ.
ЎҚИНГ: Энг зўр процессорли энг арзон 5G-флагман мутлақ рекорд ўрнатди!
