Исталган смартфонда Android 9.0 Pie’ни ҳозироқ синаб кўришингиз мумкин!
Google компанияси Android операцион тизимининг 9.0 – Pie талқинини яқинда чиқарди ва айрим смартфонлар унгача янгилана бошлаган. Аммо ушбу талқиндаги прошивкага эга бўлмаган «яшил роботчали» телефонлар эгалари учун ҳам уни синаб кўриш йўли топилди!
ЎҚИНГ: Android 9.0 Pie’гача янгиланувчи смартфонлар рўйхати эълон қилинди
Ҳар қандай Android-смартфонда операцион тизимнинг сўнгги талқини интерфейсини синаб кўриш учун янгиланган Pixel Launcher иловасини ўрнатиб олиш зарур. Таъкидлаш керакки, бунда қурилмангиз операцион тизими Android 9.0 Pie’гача янгиланмайди, балки сиз бу илова орқали фақат унинг интерфейси – ташқи кўринишинигина ишлатасиз.
Бунинг учун аввал ўз смартфонингизга номаълум манбалардан олинган иловаларни ўрнатиш учун рухсат беришингиз лозим. Гаджетингиздаги «Созламалар»га кириб, «Хавфсизлик» бўлимига ўтиб, «Номаълум манбалар» функциясини фаоллаштирасиз («Настройки» — «Безопасность» — «Неизвестные источники»)
Кейин эса мана бу сайтга ўтиб, ҳавола орқали Pixel Launcher иловасининг APK-файлини кўчириб оласиз. Буни компьютерга ёки бошқа бирор манбага эмас, балки биратўла ўша – янгиламоқчи бўлган смартфоннинг ўзига кўчириб олганингиз маъқул.
ЎҚИНГ: Android 9 Pie’га ўтмоқчимисиз? Ёдда тутинг: орқага йўл йўқ!
APK-файлини ўрнатиб бўлгач, очилган ойнада «Использовать всегда» тугмачасини босиб, дастлабки созламалар бўйича фойдаланиш учун Pixel Launcher иловасини танлайсиз.
Pixel Launcher тизимнинг ўз иловаси бўлмаганлиги сабабли, унга ўзингиз бир қатор рухсатларни беришингиз керак бўлади. Бунинг учун эса смартфонингиз «Созламалар»ига кириб, «Иловалар» бўлимига ўтасиз ва «Pixel Launcher»ни танлаб, «Рухсатлар» рўйхатини очасиз («Настройки» — «Приложения» — «Pixel Launcher» — «Разрешения»). Шу ерда бу дастур учун қўнғироқлар, ички хотира ва геолокация хизматларидан фойдаланиш рухсатини берасиз.
Ана энди смартфонингиз прошивкаси худди Android 9.0 Pie’даги каби кўринишга эга бўлди, уни ишлатиб кўриб, баҳоланг-чи?
