Йилнинг энг машҳур 10 мобиль иловаси аниқланди
Nielsen маркетинг агентлиги АҚШда ўтаётган йилнинг 10та энг оммалашган мобиль иловалар рўйхатини тузди. 2014 йил рўйхатидаги сингари бу йил ҳам Facebook мобиль иловаси барчасидан устун бўлиб чиқди. Таҳлилчилар ҳисоб-китобига кўра, ундан 126 млн одам фойдаланади.
2015 йилнинг энг тез оммалашган яна бир дастури Марк Цукербергнинг Messenger иловаси бўлди. Ушбу мессенжер 96,4 млн фойдаланувчиси билан учинчи ўринда. Унинг оммалашиш хусусияти Facebook 2014 йилда алоҳида мижозлар учун чат функциясини ажратиб дастур тайёрлагани билан боғлиқ.
Иккинчи ўринни 97,6 фойдаланувчиси билан YouTube эгаллади. Навбатдаги ўринларда Googleнинг тўрт иловаси бор. Булар: Google Search (95 млн), Google Play (89,7 млн), Google Maps (87,7 млн) ва Gmail —Google электрон почтаси (75,1 млн). 8-ўринда расмлар ижтимоий тармоғи Instagram (55,4 млн, йиллик ўсиш — 23%), 9-ўрин —Apple Music мусиқа хизмати (54,5 млн, йиллик ўсиш – 26%), 10-ўринда —Apple хариталари (46,5 млн).
Nielsen таҳлилига кўра америкаликлар Android қурилмаларини афзал кўришади. АҚШ смартфон бозорининг 52,6 фоизи Андроид операцион тизимида ишлайди (2015 йилнинг учинчи кварталига оид маълумот). iOS эса 42,7 фоизли кўрсаткич билан иккинчи ўринда. Microsoft мобиль платформаси 2,8 фоиз, BlackBerry 0,7 фоиз натижани кўрсатди.
