Йўриқнома Samsung Galaxy S8 Active смартфонини фош этиб қўйди

Samsung томонидан расмий тақдимоти ҳали ўтказилмаган, бироқ омма эътиборига ҳавола этилиши кутилаётган Galaxy S8 Active смартфони ҳақидаги маълумотлар интернетга чиқиб кетди.

Android Police нашри томонидан эълон қилинган скриншотлар аслида Samsung ходимлари учун мўлжалланган ўқув йўриқномалари бўлиб, унда янги смартфон ҳақида сўз боради.

Мазкур йўриқнома янги қурилма Galaxy S8 дан кўра бақувватроқ корпус билан таъминлангани, Quad HD+ (2960х1440 пикселли) резолюциясига ва Corning Gorilla Glass 5 ҳимоя ойнасига эга текис Super AMOLED дисплей (диагонали 5,8 дюйм) ўрнатилганини тасдиқлади.

Смартфонинг асосий камераси 12 мегапикселли, олд камераси эса 8 мегапикселли бўлади. Процессори (Qualcomm Snapdragon 835) ва хотиралари (4 гигабайт оператив ва 64 гигабайт ташқи) худди Galaxy S8 никидек.

IP68 даражасидаги сув ва чангдан ҳимоя тизимига қўшимча равишда смартфон мустаҳкамлиги бўйича MIL-STD-810G ҳарбий стандартига мувофиқ келади. Аккумлятори қуввати 4000 мА/с ташкил этади, Android 7.0 Nougat операцион тизими остида ишлайди.

Тахминларга кўра, Samsung Galaxy S8 Active смартфони 699—749 АҚШ доллари оралиғидаги нархда сотувга чиқарилади.