Камера қайд этган қоидабузарликни текшириш сайти ишга тушди

Камера қайд этган қоидабузарликни текшириш сайти ишга тушди

ИИВ Йўл ҳаракати хавфсизлиги бош бошқармаси томонидан Тошкент шаҳридаги чорраҳаларда ўрнатилган камералар томонидан автоматик равишда қайд этилган йўл ҳаракати қоидаларини бузганлик учун жаримани текшириш сайти — dyhxx.uz ишга тушди. Ҳозирча фақат UMS абонентлари бу имкониятдан фойдаланишлари мумкин.

Сайт айни пайтда синов тариқасида ишга туширилган ва ундан рўйхатдан ўтиш учун мобил телефон рақамини кўрсатиш керак бўлади. Шундан сўнг абонентга кодли SMS келади, сўнг фойдаланувчидан махфий калит сўз танлаш талаб этилади. Мазкур кириш SMS’ининг нархи 2 цент.

Шахсий кабинетда эса қоидани бузганликда гумон қилинаётган 2 тагача автомобилнинг давлат ҳамда техпаспорт рақамларини киритиб, қоидабузарлик мавжуд ёки мавжуд эмаслигини аниқлаш мумкин.

Агар текширилган машинага нисбатан қоидабузарлик аниқланса, кабинетда жарима тўғрисидаги қарор рақами, қоидабузарлик содир этилган сана ҳамда жой, қоидабузарлик тури, жарима миқдори, ҳолати ҳамда жаримани тўлаш муҳлати кўрсатилади. Мазкур ҳужжатни юклаб олиш ҳам мумкин.

Мазкур хизмат Technologic ASBT компанияси томонидан ишлаб чиқилган ҳамда ИИВ ва унинг автоматлаштирилган ахборот тизимларига уланган. Бу компания умамлакатимизда биометрик паспорт тизимини жорий қилишда Oberthur Technologies ва Thales билан биргаликда иштирок этган.

UMS абонентлари, шунингдек қоидабузарликларнинг мавжудлигини SMS орқали ҳам билиб олишлари мумкин. Бунда ҳар бир кирувчи СМС-хабар учун 5 цент ечиб олинади. Абонент бунинг учун 8860 қисқа рақамига автомобилнинг давлат рақами ва техпаспортининг серия ва рақамини (мисол учун: 01R999XY AAC5447770) юбориши керак бўлади.

Сайтимизнинг энг чиройли расмларини Инстаграмдаги саҳифамизда томоша қилинг!