Камералар “жанги”: Galaxy S7 edge смартфони LG G5 SE’га қарши
Энг сифатли тасвир олувчи смартфонларнинг камералари ўртасидаги бу галги “мусобақа”га Samsung Galaxy S7 edge ҳамда LG G5’нинг яқинда эълон қилинган махсус “SE” талқинини киритишни жоиз деб топдик.
2016 йилнинг энг яхши ақлли телефони номини олишга умид қилаётган G5’нинг анча-мунча такомиллашган “G5 SE” талқини йилнинг энг яхши камерафони бўлишга даъво қилаётган Samsung Galaxy S7 смартфонига муносиб рақиб дейиш мумкин.
Мазкур мусобақада смартфонлар кундузда олинган фотосурат, тунда олинган фотосурат, портрет, йирик деталли фотосурат ва селфи фотосурат каби 5 йўналишда куч синашади. Иккала смартфонда ҳам суратлар бир вақтда, бир хил ракурсдан олинади. Ҳар икки смартфон камерасининг HDR ўчирилиб, улар автомат созланиш тизимига ўтказилади.
Samsung Galaxy S7 Edge 12 мегапикселли бош ҳамда 5 МП олд камерага эга. У автофокус тизими, олд ва орқа фоточақноқ, оптик барқарорлаштириш тизими билан таъминланган.
LG G5 SE 16 Мпикс бош ҳамда 8 Мпикс олд камерага эга. У тасвирни рақамли яқинлаштириш (zoom), лазерли автофокус, ташқи фоточақноқ билан таъминланган.
Шунингдек, инновацион гаджетларнинг видео тасвирга олиш кўникмаси ҳам синовдан ўтказилди. Бунда уларнинг суратни оптик барқарорлаштириш тизими, видеони Quad HD (2560×1440) форматида ёзиш қобилияти ҳамда овозни сифатли ёзиш кўникмаси текшириб кўрилди.
Кундуз куни олинган фотосурат
Булутли об-ҳаво шароитида олинган сурат деталларига эътибор қаратилса, унда шубҳасизки, Samsung Galaxy S7 ғолиб бўлгани кўриниб турибди. Бу смартфон камераси суратга оқ тус балансини тўғри бера олган. Шунингдек, у олган сурат анча ёрқин ҳам.
Тунда олинган фотосурат
Тунда олинган суратлар смартфон камерларини чинакамига синовдан ўтказади. Яна кўриб турганингиздек, Galaxу S7 edge ўзининг камерафонлигини исботлай олган. Samsung флагмани олган суратда заҳиллик у қадар ҳам сезилмайди. Шунингдек, суратдаги майда деталлар ҳам аниқ-тиниқ кўриниб турибди. Манзаранинг асл ранги Galaxy S7 edge олган суратда акс этган.
LG G5 SE’да мавжуд оптик барқарорлаштириш функцияси ўз ишини уддалай олмаяпти.
Портрет
Бино ичида олинган портретни олишда смартфон камераларидан инсон қиёфасидаги сариқ тусни танлай олиш, оқ балансни меъёрида таъминлаш талаб қилинади. Samsung Galaxy S7 edge гаджети олган суратда инсон юзидан ёрқинлик таралиб турибди. Аммо LG G5 SE бу беллашувда деталларга бой сурат олишда кучли эканини намойиш қилди.
Макро ёки яқиндан суратга олиш
Lego-одам ҳайкалчаси макро сурат олишга ёрдам беради. Бу курашда ҳар иккала смартфон, яъни LG G5 SE ҳам, Samsung Galaxy S7 edge ҳам қобилиятли экани кўриниб турибди. Ҳар иккала суратда ранглар ёрқин ва ўз меъёрида. Ҳатто LG G5 SE’да бир оз устунлик бордек.
Автопортрет ёки селфи
Мана кўриб турибсизки, Galaxy S7 edge қурилмасининг 5 мегапикселли олд камераси LG G5 SE аппаратининг 8 мегапикселли олд камерасига ютқазиб қўйди. Бу суратда ҳам инсон қиёфасида ёрқинлик, файз бор. LG G5 SE’нинг селфи-камерасида озгина ёрқинлик устунлик қиляпти.
Сифатли видеотасвир олиш
Full HD форматидан ҳам яхшироқ видеотасвир олиш инновацион флагманларнинг ўзига хослигидир. Тасвирга олиш асосан телефонларнинг процессорларига боғлиқ масала. Чунки сониялар ичида чиплар катта ҳажмли маълумотли қайта ишлаши керак бўлади. Синов вақтида ҳар иккала смартфонда Ultra HD (3840×2160) ҳамда Full HD (1920×1080) форматларида видео ёзиб кўрилди.
Гувоҳи бўлганингиздек, LG G5 SE смартфонининг Snapdragon 652 процессори панд берди. Унинг ўрнида G5’нинг илк талқинида фойдаланилган Snapdragon 820 бўлганида қойилмақом бўлган бўлар эди. Ҳатто Full HD видеотасвирда камчиликлар сезилган. Samsung’нинг “ақлли телефони”даги кучли Exynos 8890 процессори тиниқ видео ёзиб олишга хизмат қилган.
Синов жараёнида LG смартфони тасвирни оптик барқарорлаштиришда пешқадам эканини исботлай олди.
Сифатли овоз ёзиш
Овоз ёзишда ҳар иккала LG G5 SE ва Samsung Galaxy S7 edge телефонлари юқори кўрсаткичга эга бўлдилар.
Сурат ва видеотасвир олишда Galaxy S7 edge ўзининг кучли эканини исботлай олди.
Сифатли овоз ёзишда ҳам Galaxy S7 ўзининг устун эканини кўрсатди. Аммо оптик барқарорлаштиришда LG смартфони етакчилик қилди. G5 SE’га янада кучлироқ процессор ўрнатилса, унинг видеони ёзиш қобилияти ошган бўлар эди. Айниқса, Ultra HD видео ёзиш унинг учун қийинчилик туғдирмоқда.
