Касперский лабораторияси: «Биринчи чоракда DDoS-ҳужумлар сони камайган»
Жорий йилнинг биринчи чорагида бутун дунё бўйлаб DDoS-ҳужумлар сони анча камайгани маълум бўлди. Бу хусусда Касперский лабораториясининг чораклик ҳисоботида маълумот берилган, деб ёзади Anti-Malware сайти.
Kaspersky DDoS Intelligence тизими томонидан аниқланишича, йилнинг илк чораги мобайнида дунёнинг 72 та мамлакатида жойлашган нишонларга шундай ҳужумлар уюштирилган.
DDoS-ҳужумларга нишон бўлган объектлар сони бўйича биринчи ўринда одатдагидек Жанубий Корея турибди, иккинчи ўринни эса АҚШ эгаллаган. Нидерландия 2015 йилнинг апрелидан буён илк бора Хитойни кучли учликдан сиқиб чиқарган – «осмон ости салтанати» еттинчи ўринга тушиб қолган. Россия бу рўйхатда бешинчи поғонада турибди. Ҳужумлар нишонлари сони бўйича кучли ўнликдан Япония, Украина ва Болгария чиқиб кетган. Уларнинг ўрнига эса Гонконг, Руминия ва Германия келган.
DDoS-ҳужумлар нишонлари кўп бўлган мамлакатлар:
Бу чоракда DDoS-ҳужумларнинг операцион тизимлар бўйича тақсимланиши ҳам ўзгарган. Linux тизимидаги «Буюмлар интернети» қурилмалари ботларини сиқиб чиқариб, биринчи ўринга Windows-ботлар кўтарилиб олган. Уларнинг улуши ўтган чоракдаги 25 фоиздан 2017 йилнинг январь-март ойларида 60 фоизгача чиққан.
Ҳисобот даври мобайнида бирорта ўта кучли ҳужум қайд этилмаган, бироқ шифрлашни қўллаган ҳолда амалга оширилган ҳужумлар сони ошган. Бу эса Касперский лабораториясининг бултурги прогнози билан мос келаётир: стандарт ҳимоя воситалари билан аниқлаш қийин бўлган DDoS-ҳужумлар оммалашмоқда.
Умуман олганда, йилнинг боши бирмунча «тинч» бўлган – энг кўп сонли (994 та) ҳужум 18 февралда амалга оширилган. Ҳужумнинг давомийлиги бўйича рекорд эса атиги 120 соатни ташкил этган. 2016 йилнинг сўнгги чорагида эса энг узоқ давом этган ҳужум 292 соатга чўзилган эди.
Kaspersky DDoS Prevention’нинг Россиядаги менежери Алексей Киселев шундай дейди:
«Йилнинг боши DDoS-ҳужумлар сонининг пасайиши беш йилдан буён анъанага айланиб бораётир. Бу киберҳужумчилар ёки уларнинг буюртмачилари ўзларига «меҳнат таътили» белгилашлари билан боғлиқ бўлиши мумкин. Бироқ барибир, 2016 йилнинг биринчи чорагига нисбатан ҳужумлар сони анча юқори бўлди, бу эса буёғига улар янада кўпайишини англатади. Шу боис ҳам хотиржамликка асос йўқ, кибержиноятчилар одатий иш ритмига ўтишларини кутмасдан, ҳимояланиш чораларини кўриш лозим».
