Компьютердан қандай фойдаланасиз?  

Компьютердан қандай фойдаланасиз?   

Ҳар қандай буюм узоқ йиллар хизмат қилиши учун, албатта, унга қоидасига мувофиқ муносабатда бўлиш ва белгиланган тартибда фойдаланиш жуда зарур. Айниқса, бу қонун-қоидалар техник қурилмалар учун катта аҳамиятга эга. Шу жумладан, компьютер технологияларида ҳам.

Баъзи фойдаланувчилар, ишлаб бўлгач, компьютерни шунчаки манбадан узиб кетаверади. Бу жуда қўпол тартиб ва бундай ҳолат компьютердаги барча маълумотлар, файллар ҳамда дастурларнинг шунчаки йўқ бўлиб қолиш эҳтимолини келтириб чиқаради. Аниқроқ қилиб айтадиган бўлсак, операцион тизим ёқилганда дастурлар юкланмаслиги, ишлаши учун керак бўладиган иловалар очилмаслиги мумкин.

Ёдда тутинг, ҳатто клавиатура, яъни ёзув тугмачалари ишламай, Reset – қайта юклаш буйруғи ҳам ёрдам бермайдиган вазият бўлса-да, компьютерни тўғридан-тўғри манбадан узмаслик шарт. Бундай ҳолатда Power тугмачасини қайта босиб, бир оз ушлаб туриш керак.

Ҳа, яна бир гап. Кўпчилик мониторни шунчаки ўчириб, шу билан мақсадга эришдим, деб ўйлайди. Аммо бу янглиш фикр. Чунки монитор ўчирилгани билан операцион тизим ва қаттиқ диск бу пайтда ишлаётган бўлади.

Шундай қилиб, компьютерни ўчириб-ёқишни яхши билишингизга асло шубха қилмаган ҳолда, қандай тўғри ўчириш кераклигини яна бир бор эслатиб ўтамиз:

Ўчиришдан аввал барча зарурий маълумотларни сақлаб, очиқ дастурларни ёпиш керак.

Сўнг, менюдаги “Пуск”ка кирасиз, ўчириш пунктини танлайсиз. Ойнадаги “Компьютерни ўчириш” деган қисмидан “Ўчириш” ёки “Ишларни якунлаш” тугмасини босасиз. Айтганча, Alt+F4 бирикмаси билан барча дастурлар ва компьютерни ўчирсангиз ҳам бўлади. Аслида, бу жуда оддий ва кўп вақт талаб қилинмайдиган жараён. Энг муҳими, бу пайтда эринмаслик ва ҳафсала.

Шахсий компьютерингизни қоидаларга мувофиқ ишлатсангиз, у сизга сифатли ва узоқ йил хизмат қилади.

Сайт янгиликларидан доимий хабардор бўлиш учун Телеграм каналимизга қўшилинг!