Криптофирибгарлик учун 18 ой қамоқ жазоси берилган "ёлғиз хакер" ҳақида
Декабрнинг илк куни 25 ёшли Николас Труглиа учун омадли келмади. Манхеттенлик "компютер даҳоси" 2018 йилда Transform Group раҳбари, блокчейн маслаҳатчиси Майкл Терпин телефонига бузиб кириб 22 миллион доллар криптовалютани ўғирлаш схемасида иштирок этганликда айбланди ва у бунинг учун 18 ойлик қамоқ жазосига ҳукм қилинди, дея хабар бермоқда Bloomberg нашри.
Аслида Николас қилмиши учун 51 ойдан 63 ойгача бўлган муддатга ҳукм қилинаётган эди. Бироқ, унинг адвокати, Жеффри Уделл, ўз мижозига аутизм ташхиси қўйилганлигини ва у учун виртуал дунёни ҳақиқийсидан ажратиш қийин эканлигини маълум қилган. Қолаверса, у Николасни жуда ақлли одам сифатида таърифлаган ва унинг Интернетдаги танишларидан бошқа ҳеч кими, на оиласи, на дўстлари борлигини таъкидлаган. Эҳтимол, шу сабаб ҳам Манхеттендаги АҚШ округ судяси жазони енгиллаштирган.
"Мен ҳеч қачон бировни юзма-юз тунамайман, Интернетда буни қилганим эса шармандаликдир", дейди Николас судда жабрланувчидан кечирим сўраган ҳолда.
Маълум бўлишича, Майкл Терпинга уюштирилган киберҳужумда Николасдан ташқари яна уч кишининг қўли бўлган. Шунга қарамай, фақатгина у жиноий жавобгарликка тортилган. Ҳукмни муҳокама қилиш жараёнида унда қиймати 53 миллион долларга тенг бўлган крипто, санъат ва заргарлик буюмларини ўз ичига олган активлари борлиги маълум бўлган ва Николас улар билан 20 миллион доллардан ортиқ товон пулини тўлашга рози бўлган. Ҳозирда у ўзига берилган муддатнинг аллақачон 1 йиллигини ўтаб бўлганлиги айтилмоқда.
ЎҚИНГ: Эд Шираннинг ҳали чиқарилмаган қўшиқларини ўғирлаган хакерга ҳукм ўқилди
