КУН ВИДЕОСИ: Galaxy Note 9’ни ҳали чиқмаган iPhone’лар билан таққослашди!
Samsung компанияси яқинда тақдим этилган Galaxy Note 9 фаблетини аллақачон сотувга ҳам чиқарди. Энди сентябрда унинг асосий рақобатчиси – Apple ҳам янги смартфонларини намойиш этиши кутилаётир.
ЎҚИНГ: Galaxy Note 9 сотувга чиқмасиданоқ рекорд ўрнатди!
MacRumors ресурси жамоаси қизиқарли видеоролик тайёрлади: унда Samsung Galaxy Note 9 планшетофони ҳамда бу йил тақдим этиладиган iPhone’лар ўзаро солиштирилган. Тўғри, айфонлар ҳали расман кўрсатилмагани учун, видеода улар ўрнига инсайдерлик маълумотлари асосида тайёрланган макетлари қўлланган; жанубий кореяликнинг фаблети эса ҳақиқий.
Ҳозиргача тарқалган маълумотларга кўра, 2018 йилда Apple корпорацияси бултурги суперфлагмани – iPhone X’нинг «авлод»ини тақдим этиши керак; у диагонали 5,8 дюймлик OLED-дисплейга эга бўлиши кутилмоқда. Шунингдек, 6,5 дюймлик OLED-экранли iPhone X Plus модели ҳамда 6,1 дюймлик LCD-дисплейга эга ҳамёнбоп айфон ҳам чиқиши аниқ. Яқинда аниқланишича, купертинолик гигант булардан ташқари тўртинчи янги смартфонни ҳам тайёрламоқда.
ЎҚИНГ: Apple барибир iPhone SE 2’ни ҳам чиқаряпти – жами тўртта янги айфон!
Samsung Galaxy Note 9 модели диагоналига 6,4 дюймлик, «ўйиқ»сиз дисплейга эга, iPhone’ларнинг эса барчасига купертиноликнинг юбилей суперфлагмани – iPhone X сингари «кемтик»ли экран ўрнатилади. Улар 12 сентябрда расман тақдим этилиши кутилмоқда.
Хуллас, мана, қуйидаги лавҳада уларни ўзаро таққослаб кўрамиз:
Экрани 6,4 дюймлик Samsung Galaxy Note 9 корпусининг ўлчамига кўра дисплейи 6,5 дюймлик iPhone X Plus ўлчамидан ҳам каттароқ бўлиб чиқди. Шунингдек, ролик муаллифининг таъкидлашича, iPhone’ларнинг корпуси нисбатан қулай шаклда. Samsung Galaxy Note 9 эса айфонларда мавжуд бўлмаган 3,5 миллиметрлик қулоқчин тирқишига, орқа панелида дактилоскопик датчикка ҳамда S-Pen стилуси жойланадиган слотга эга.
