Кутилмаганда ҳамёнбоп Honor 9X Lite тақдим этилди, тағин Google сервислари билан!
Huawei компаниясининг суббренди Honor 9X Lite русумли смартфони ҳақидаги миш-мишлар февралдан бери тинчиб қолганди. Ҳали тақдим этилмаган ушбу қурилма ўшанда Покистондаги дилерлардан бирининг онлайн листингида пайдо бўлган эди.
ЎҚИНГ: Honor 30, 30 Pro ва 30 Pro+ тақдим этилди: 424 доллардан бошланувчи 5G-флагманлар!
Кеча – 16 апрель куни умуман кутилмаганда Европада ушбу смартфон намойиш этилди. Honor 9X Lite дастлаб Финляндия, кейинроқ бошқа мамлакатлар бозорларига чиқарилади.
Янги смартфон унчалик янги бўлмаган процессор – Kirin 710 базасига қурилган. Бунинг сабаби – хитойлик техногигант айни шу чипсетли Honor смартфонларини Google сервислари билан чиқаришга ҳақли.
Honor 9X Lite янги дизайнда, 4/128 гигабайтлик тезкор/ички хотира билан тақдим этилган, унга яна microSD форматли хотира картаси ҳам тушади. Смартфон экрани диагоналига 6,5 дюймлик, тасвир аниқлиги эса FullHD+ форматида. Дисплейнинг юқори қисми марказида 16 мегапикселлик олд камера учун катта кемтик мавжуд.
Девайснинг бош камераси эса янгича кўриниш касб этган ва унинг 48 мегапикселлик асосий модули F/1,8 диафрагма билан тақдим қилинган. Қўшимча – 2 мегапикселлик чуқурлик датчиги эса F/2,4 диафрагмали объективга эга. Шунингдек, бармоқ изи сканери ҳам орқа қопқоқ ўртасига жойланган.
Honor 9X Lite аккумулятори ток сиғими 3750 мА/соатлик ва у 10 ваттлик асосда тезкор қувватлана олади. Смартфонга Android 9 Pie операцион тизим талқини асосида тайёрланган EMUI 9 график қобиғи ўрнатилган. Компания бу модели учун 30 апрелдан, 199 евро нархида олдиндан буюртмалар ола бошлайди; очиқ савдога эса уни 14 майдан чиқаришади.
Дарвоқе, ишлатилса ҳам нархини кўп йўқотмайдиган смартфонлар топ-ўнталигидаги нақ еттита ўринни айнан Huawei ва унинг Honor брендига мансуб моделлар банд этганидан хабарингиз бормиди?