«Лайфхакер»га кўра 2019 йилнинг энг фойдали Android-иловаси
Яқинда App Annie таҳлил фирмаси кейинги ўн йил мобайнида бунё бўйлаб энг кўп юклаб олинган мобил дастурлар ўнталигини эълон қилган эди. Оммабоп ва фойдали «Лайфхакер» нашри эса ўз версиясига кўра 2019 йилнинг энг зўр иловасини айтди.
ЎҚИНГ: Инглиз тилини ўрганиш учун 15 та энг яхши илова
Таҳририятнинг фикрича, якунига етаётган йилнинг Android‑смартфонлар учун энг яхши дастури – Digitox экан. Phosphorus томонидан тақдим этилган ушбу буткул бепул илова кишининг смартфонга тобеликдан қутулишига ёрдам беради.
Аслида аксарият Android‑смартфонларда «Рақамли фаровонлик» («Digital Wellbeing» – «Цифровое благополучие») функцияси мавжуд ва у ҳақда мана бу мақоламизда маълумот берганмиз. Лўнда қилиб айтганда, у гаджетдан фойдаланишингиз статистикасини юритади, айнан нималарга кўпроқ вақтингизни исроф қилаётганингизни англашга, уларни чеклаш ёрдам беради.
Digitox иловаси эса мана шу функциядан маҳрум смартфонларга шу фойдали имкониятларни бахш этади. У сизнинг энг кўп қайси дастурларни ишлатаётганингиз, қанча билдиришнома олаётганингиз ва смартфонни қанчалик тез-тез ёқаётганингизни кўрсатади.
ЎҚИНГ: Ижтимоий тармоқларга тобеликдан қутулиш йўллари...
Мазкур дастурий таъминот бугунги ва кечаги кун учун, шунингдек, ўтган ҳафта учун ҳам статистикани тайёрлаб беради. Шунингдек, смартфонингиздаги исталган илованинг кунлик ишлаш вақтига лимит қўя олади. Нафақат бу, балки умуман смартфондан фойдаланишингиз вақтига ҳам лимит қўйишга қодир у!
Гаджетларга боғланиб қолиш – бугунги кунда тобора кўп учраётган хавфли омиллардан биридир. Олимлар ҳатто унга ном ҳам қўйишган: номофобия – бирор муддатга смартфонсиз қолишдан қўрқиш касаллиги. Digitox эса айнан шунга чалинишнинг олдини олишда тенги йўқ ёрдамчидир.
Агарда сиз ҳам фарзандларингизнинг ёки ўзингизнинг смартфонга, ундаги илова ва ўйинларга ҳаддан ортиқ ружу қўйишингиз мумкинлигидан чўчисангиз, Digitox дастурини мана бу ҳавола орқали ўрнатиб олинг.
ЎҚИНГ: Хакерлар энг кўп қайси смартфонларни ва иловаларни «севадилар»?
