Leica битта автомобиль нархида... оқ-қора камера тақдим этди!
Замонавий камерофонлар сабабли ҳозирда алоҳида камераларга эҳтиёж қолмагандек туюлади. Масалан, DxOMark сервиси турли смартфонларнинг фото ва видео тасвирга олиш имкониятларини юқори баҳолаб келаётир.
ЎҚИНГ: DxOMark камераси энг кучли ўйин смартфонини эълон қилди
Лекин профессионал сураткашлар барибир фотокамера ишлатишади; уларни ишлаб чиқарувчилар ҳам янги-янги моделларни тақдим этишмоқда. Энг машҳур камерасозлардан бири – Leica эса куни кеча жуда антиқа янги моделини намойиш қилди.
Leica M10 Monochrome деб номланган ушбу фотокамера, номидан ҳам англашилиб турганидек, фақат монохром – оқ-қора рангларда суратга олишга ярайди. Шундай бўлса-да, ишлаб чиқарувчининг иштаҳаси карнай – бу камерасини у нақ 8295 АҚШ долларига нархлаган! Ахир, бу пулга эса яп-янги битта машина олса бўлади!
ЎҚИНГ: Қабр тошига камера ўрнатиш ФБРга нимага керак бўлган?
Гарчи смартфонларда аллақачон нақ 256 мегапикселлик камера қўллана бошлаган бўлса-да, Leica бу моделига атиги 40 мегапикселлик датчик ўрнатган. Компаниянинг таъкидлашича, уни айнан оқ-қора фотография учун «нолдан бошлаб» янгидан лойиҳалаштиришган: мазкур сенсор кенг динамик диапазонга эга, унда ёруғлик сезувчанлигини ISO 160-100 000 оралиқларида танлаш мумкин.
Оқ-қора съёмка мавзуси Leica M10 Monochrome қиёфасида ҳам акс эттирилган: унинг корпусида анъанавий қизил Leica логотипи ёки умуман бирорта рангли детал йўқ. Уни шовқинсиз затвор, сенсор дисплей, Wi-Fi интерфейси билан таъминлашган. Янги модел Leica монохром камераларининг учинчи авлоди бўлиб, Leica Fotos сервисини қўллаб-қувватлайди.
Мана, унда олинган суратга битта мисол:
Компания вакилларига кўра, Leica M10 Monochrome монохром сенсори жаҳондаги энг зўр оқ-қора расмларни тақдим этади – бирорта рангли фотокамера оқ-қора форматга ўтказилганида бунчалик сифатга эриша олмайди.
ЎҚИНГ: YouTube’да атиги бир ойда 1,6 миллион обуначи тўплаган қиз барча видеоларини шу смартфонда оляпти!
