Lenovo Z5: инқилобий смартфон олд юзасини илк бор тўлалигича кўрамиз!

  •   DiMaX
  •  1862
  •  01.06.2018 13:02

Lenovo Z5: инқилобий смартфон олд юзасини илк бор тўлалигича кўрамиз!

Тез кунларда – 5 июнь куни расман намойиш этиладиган Lenovo Z5 нафақат энг кутилаётган, балки энг сирли смартфонлардан биридир. Ишлаб чиқарувчи унинг тўртта технология бўйича рекордчи бўлишини даъво қилаётир.

ЎҚИНГ: Нақ тўртта технология бўйича рекордчи – Lenovo Z5 мобил фотографияда ҳам бурилиш ясаяпти!

Ушбу компания ўз брендини бозорга тўлақонли қайтариш учун янги флагманини жуда илғор қилиб тайёрламоқда. Аммо қурилманинг ўзидан ваҳимаси катта бўляпти: Lenovo кам-камдан бу смартфонининг турли жиҳатларини эълон қилиб, ҳамманинг диққатини унга жалб этиб келаётир.

Масалан, Lenovo Z5 флагманининг нақ 4 терабайтлик ички хотирага эга версияси ҳам чиқарилади. Бу қурилма шу пайтгача бозорга тақдим этилган смартфонлар орасида энг ромсизи бўлиши ваъда қилинган. Лекин унинг энг қизиқ хусусиятларидан бири аккумулятори билан боғлиқ. Смартфон батареясини битта тўлдирганда унинг қуввати 45 кунгача етади, дейишяпти – бунақаси бўлмаган, ахир! Яна...

ЎҚИНГ: Lenovo Z5 флагмани ҳатто қуввати 0 фоизга тушганда ҳам ишлайди

Шу кунларда компания бу моделини мақташда сал танаффус қилиб турибди, лекин Lenovo Z5 билан боғлиқ битта маълумотни бошқа манбалар интернетга чиқариб юборишди. Аниқроғи – смартфоннинг олд панели тўлалигича акс эттирилган биринчи сурат тарқалди. Айтиш керакки, Lenovo шу пайтгача бу флагманининг фақат айрим қисмларинигина кўрсатиб келаётган эди.

Хуллас, агарда чет манбаларга ишонадиган бўлсак, Lenovo Z5 олд панели қуйидагича экан:

Кўриб турганингиздек, Lenovo Z5 экранининг пастида, гарчи юпқа бўлса-да, барибир роми мавжуд. У ерда смартфоннинг олд камераси ва бошқа керакли датчиклар ўрин олган. Шунингдек, хитойликлар бу қурилмаси экранида iPhone X дизайнига эргашишмагани ҳам аҳамиятли.

Ҳали Lenovo Z5 тақдимотигача унинг бошқа суратлари, шунингдек, турли жиҳатлари ҳақида маълумотлар чиқиб қолса керак. Улардан биринчилар қаторида баҳраманд бўлиш учун биздан узоқлашманг.

ЎҚИНГ: Ромсиз Lenovo Z5 смартфони: орқа корпуси шишали бўлади

Terabayt.uz сайтининг видеолари: Youtube'даги каналимизда!