LG атиги 150 долларга учталик камерали, «ўлдириб бўлмас» смартфон чиқарди! (+«жонли» видео)

Жанубий Кореянинг ушбу компанияси мустаҳкам муҳофазаланган LG K51 смартфонини тақдим этди. LG UX график қобиғи остидаги Android 9.0 Pie операцион тизимли бу қурилма АҚШ ҳудудида атиги 150 доллардан сотилади.

ЎҚИНГ: LG ҳақида 5 факт

LG K51 смартфони MIL-STD-810G ҳарбий стандартига кўра сертификатланган, яъни унинг корпуси нафақат сув ва чангдан, балки зарбалардан ҳам ҳимояланган. Унинг аккумулятори 4000 мА/соатлик бўлиб, замонавий USB Type-C порти орқали қувватланади.

Смартфоннинг экрани диагоналига 6,5 дюймлик ўлчамга эга. Тасвир аниқлиги 1560х720 пикселлик дисплейнинг томчисимон кемтигига 8 мегапикселлик селфи-модул жойланган.

LG K51 бош камераси эса фоточақноқ билан бирга горизонтал блокка олинган учта датчикдан иборат. Асосий сенсор 13 МПлик (f/1.8), иккинчиси 5 МПлик (кенг бурчакли оптика, f/2.2) ва сўнггиси – 2 МПлик чуқурлик датчиги (f/2.4).

Орқа панелга бармоқ изи сканеридан ташқари стереодинамиклар ҳам жойланган. Компаниянинг таъкидлашича, улар тиниқ ва ҳажмдор овоз янгратиш хусусиятига эга.

ЎҚИНГ: DxOMark’нинг янгича рейтинги: овози энг зўр смартфонлар!

«Ўлдириб бўлмас» LG K51 смартфонининг қадоғи очиб ишлатиб кўрсатилган «жонли» видеосини томоша қиламиз:

«Ички дунёси»га келадиган бўлсак, LG K51 максимал 2,0 ГГц такт частотасида ишловчи MediaTek Helio P22 процессори базасига қурилган. Унинг тезкор хотираси 3, доимийси эса 32 гигабайтлик ҳажмга эга. Булардан ташқари, унда нақ 2 терабайтгача ҳажмли microSD-карта учун слот ҳам мавжуд.

ЎҚИНГ: Биринчи «ўлдириб бўлмас» 5G-смартфон энг кучли процессорга ҳам эга!