LG G5: намойиш, янгилик ва қулоққа чалинаётган гаплар
The LG G5 телефон аппаратининг 21 февраль куни, Барселонада ўтадиган Жаҳон мобиль саноати ва конгрессида тақдим этилиши кутилмоқда. Сизга бу қурилмага оид мутахассис ва нашрларнинг тахмин ва янгиликларини ҳавола қиламиз. Бу жиҳатлар намойиш этиладиган қурилмага нисбатан фарқли бўлиши мумкин.
LG G4 тақдимотидан олдин ҳам бу қурилманинг тезда оммалашиши кутилган эди. Бироқ унинг жиҳатлари фойдаланувчилар кутганидек бўлмади. Аммо 2016 йилда LG мухлислари учун яхши янгилик тайёрлагани аниқ.
G4 қурилмасида гувоҳи бўлганимиздек, LG ҳозирча ҳаммага маъқул бўлаётган металл ёки шишали корпус устида бош қотираётгани йўқ. Пластик ва чарм компания мобиль қурилмаларининг қобиғидаги асосий хомашёдир. Лекин Apple, Samsung, HTC ва Sony айни шу борада мобиль қурилмалар бозорида илгарилаб бораётгани сир эмас.
Индаллога ўтамиз
Naver.com нашрининг ёзишича, янги мобиль аппарат металл корпусли бўлади. Унинг экрани устидан пастга томон букилган бўлиши ҳам мумкин. Қурилманинг орқа томонидаги ўчириб-ёқиш тугмаси ўз навбатида бармоқ изларини олувчи сканер вазифасини ҳам ўтайди.
Тахминларга кўра унинг корпуси аккумуляторидан ажраладиган ёки бир бутун шаклда бўлиши мумкин.
Cnet Korea маркетинг ва консалтинг компанияси вакилининг маълумотича, қурилма қувват тоши (аккумулятор) учун корпус орқасида замонавий флагман телефонлар SIM картасиники каби махсус жой ажратилади.
Овоз тугмаси қурилманинг икки биқинидан ўрин олади. Унинг ўлчами 149.4 x 73.9 x 8.2 мм бўлади. Бу дегани у 155 грамм тош босувчи LG G4 қурилмасидан новча, аммо юпқа ва енгил бўлади.
LG G5 Marshmallow операцион тизими билан ишлайди.
Унинг 5.6 дюймли дисплейи 4K технологиясига эга бўлади. Яъни ундаги пикселлар сиғими 3840 x 2160 белгига тенг бўлади. Бу тасвирнинг ўта ёрқинлиги ва аниқлиги дегани.
2016 йил 4K технологиясига эга дисплейли смартфонларга бой бўлиши тахмин қилинмоқда. Ҳатто 4K форматидаги видеотасвир олувчи телефон қурилмалари ҳам оммалашса ажаб эмас.
Экран тури – IPS LCD touchscreen, 16M. Экран Corning Gorilla Glass 4 ҳамда LG Optimus UX 5.0 UI ҳимоя қатламига эга.
LG G5 намойиши
LG’нинг 2015 йилги Android смартфони – LG G4 апрель ойида тақдим қилинган эди. Ш убоис, навбатдаги флагманнинг ҳам баҳорда намойиш қилиниши кутилаётган эди. Компания эса бу кунни олдинроққа кўчирган, намойишни Барселонада ўтадиган Жаҳон мобиль саноати ва конгрессида тақдим этишга қарор қилган кўринади.
Компания бу қарорга бежизга келмаган. Боиси Samsung Galaxy S6 ва HTC One M9 намойиши 2015 йилда айни шу тадбирда, LG G4 тақдимотидан 2 ой илгари ўтказилган эди. Бу эса LG компанияси қурилмасининг оммалашувига таъсир ўтказмасдан қолмади. LG навбатдаги пойгада Samsung Galaxy S7 ва HTC One M10 воситаларининг LG G5’дан илгари намойиш этилишига йўл қўймоқчи эмас.
Ўзига хос жиҳатлари
- Тўлиқ металл қоплама
Гарчи, компаниянинг пластик ва чарм қоплама корпусларининг жозибаси HTC One M9 ёки iPhone 6’нинг металл қобиқларидан кам бўлмаса ҳам, металл қоплама аппаратларга ҳашамдорлик бахш этади.
- Сканер тизими
Деярли барча, ҳатто янги қўл телефонлари брендлари ҳам бармоқ излари сканерига эга бўлган бир маҳалда LG’нинг бу ишни кечиктириб келгани шармандали ҳолат эди. Янги қурилма орқасидаги қувват таъминоти тугмасининг сканерга айланиши ажойиб янгилик бўлди.
Яна бир қойилмақом янгилик шундаки, LG G5’да кўз қорачиғини сканер қилиш орқали тизимга киришга рухсат бериш технологияси татбиқ қилиниши мумкин. Яъни, у эгасини кўзига қараб танийди. Қурилма 50 см масофадан туриб кўзни фарқлай олади.
- Янада инновацион дисплей соҳиллари
Samsung Galaxy S6 Edge қурилмасининг икки биқинидаги соҳил экранлари кўзимизга қанчалик чиройли кўринган бўлса, LG янги телефонда татбиқ қилмоқчи бўлган дисплейнинг тепа ва пастки томонларидаги экран соҳиллари шу қадар жозибали туйилиши аниқ. Бу каби қайрилма экранлар хабарларни осон ўқиш имконини беради.
- 4K экран
LG экран масаласида юқори тажрибага эга ва доим олға юрган. Навбатдаги смартфоннинг 5.5 дюймли 4K (3840 x 2160) экрани ажойиб тиниқликка эга. Ҳар бир дюймда 801 та пикселлар дегани! Бу эса экрандан Virtual Reality – виртуал воқелик технологиясида ҳам фойдаланиш мумкин дегани.
Шунингдек, экраннинг 5.6 дюйм, 2560×1440 пиксель сиғимига эга, HD форматидан 4 маротаба сифатли тасвирга эга QHD форматида бўлиши мумкинлиги ҳақида ҳам тахминлар бор. Ундай бўлса, виртуал воқеликни ҳозирча унутамиз.
- Мустаҳкам қувват манбаи
LG G2 мобиль алоқа воситасини ҳисобга олмаганда, компания сўнгги йилларда бу йўналишдаги илғорлиги билан мақтана олмайди. Фойдаланувчилар қурилмада ундан энг камида икки кун фойдаланиш имконини берувчи аккумулятор кутишмоқда. Унда симсиз қувватлаш технологияси ҳам бўлиши мумкин.
Манбааларнинг ёзишича, қурилма 4000 мАс Li-ion туридаги 1 соатда, тезкор қувватланувчи аккумуляторга эга бўлади. Компания Qualcomm Quick Charge 3.0 технологиясини татбиқ қилиш учун ҳамкорлик қилаётган экан. Бундан кучсизроқ қувват тошининг 4K тасвирга узоқ вақт дош бериши қийин.
- Тезкорлик
3ГБ тезкор хотирага эга LG G4 бу масалада мухлисларни хафа қилган эди. Нафақат тасвирга олиш, балки ўзаро иловалардан фойдаланишда ҳам сустлик сезилади. LG G5 бу каби камчиликлардан фориғ бўлса ажаб эмас. Боиси унда 64bit Qualcomm Snapdragon 820 процессорининг бўлиши кутилмоқда. Яъни 4G LTE CAT9 тармоғида секундига 450МБ маълумотни алмашиш мумкин.
Қўшимча 64ГБ microSD хотирани 200 ГБгача бўлган хотирага алмаштирса бўлади. LG G4 аппаратида эса ундан кучсизроқ бўлган Snapdragon 808 ўрнатилган.
Қурилма 2G, 3G, 4G LTE, HSPA, EDGE, GPRS каби алоқа тармоқларида фаолият кўрсатади.
- Тезкор камера
Қурилмадаги бош камера 20МП бўлиб (LG G4 камераси эса 16МП), Sony компаниясининг 0.5 дюйм (12.7 мм)ли сенсор камераси ҳисобланади. Унда лазерли автофокус, OIS, LED чақнаш, фокусни тўғирлаш, юз ва табассум детектори, панорама, ишора орқали бошқариш каби функциялар мавжуд. Қурилма 2160х1080 форматда стерео овозли видеотасвирни ёзиб олади.
LG G4 камерасини ёқиш учун 0.6 секунд вақт керак. Овоз тугмаси орқали эса уни 2 сонияда ишга тушириш мумкин.
Бошқа бир манбаанинг айтишича, мобиль воситасининг орқа камераси 21 МП ва олд камераси 5 МП бўлиши мумкин.
- Чертиш коди
LG мобиль қурилмалари тизимига уларнинг экранига чертиш кодларини киритиш орқали кириш мумкин. Янги инновацияда худди шу йўл орқали уни “ухлатиш”, яъни блоклаш ҳам мумкин. Аммо жараён секин амалга ошади. Шунингдек, фойдаланувчилар 86 минг комбинацияга эга чертиш кодлари бармоқ излари сканеридан кўра ишончликроқ эканини айтишмоқда. Янги қурилмада кўз ёки бармоқ излари сканери татбиқ қилинса ҳам, кодли кириш сақланиб қолиши ҳам мумкин.
- Интерфейс
Қурилма интерфейсида microUSB v2.0 (SlimPort 4K) ҳамда USB Host портлари мавжуд.
- Нарх-наво
Ҳозирча аниқ маълумот йўқ. Лекин LG G5 900 АҚШ долларидан сотилиши мумкин. 32ГБ, пластик корпусли LG G4 Amazon интернет дўконида 609 АҚШ доллари, чарм қопламалиси 584 доллардан сотилмоқда. “Малика” бозорида эса бу қурилма нархи 3 050 000 сўм.
