MacBook Air 2020 чиқди: янгиланган клавиатура ва процессорлар, камида 256 ГБ SSD!

Apple корпорацияси ортиқча тантаналарсиз янгиланган ноутбуки – MacBook Air 2020 моделини тақдим этди. Ташқи кўринишидан у ўтган йилгисидан фарқ қилмайди.

ЎҚИНГ: Apple жаримага тортилиши мумкин

Лекин янги «тишланган олмали» ноутбукнинг «ички дунёси» анча бойиган. Аввало, унинг минимал конфигурацияси энди 256 гигабайтлик SSD-хотирага эга (олдингисида 128 ГБлиги бўлган). Хоҳловчилар 512 гигабайтлик MacBook Air 2020 харид қилишлари, шунингдек, 1 ёки 2 терабайтлик SSD-сақлагичга эга модели учун буюртма беришлари мумкин.

Яна бир яхши томони – бу йилги MacBook Air клавиатурасида муаммоли «капалак» механизмидан воз кечиб, худди MacBook Pro 16 моделидаги каби «қайчили» механизмга ўтилган.

Булардан ташқари, Apple ушбу ноутбуки процессорларини ҳам янгилаган. Хоҳловчилар учун икки ядроли Intel Core i3 ҳамда тўрт ядроли Core i5 чипсетига эга MacBook Air 2020 моделларидан бирини танлаш имкони бор. Ҳар иккала процессор ҳам 10-авлодга мансуб бўлиб, максимал частотаси 1.1 ГГц.га тенг.

MacBook Air 2020 тилларанг, кумушранг ва кул ранг корпусларда чиқарилган бўлиб, нархи 1000 доллардан бошланади. Ушбу енгил лаптоп аллақачон АҚШда сотила бошлади, бошқа мамлакатлар бозорларига эса кейинроқ етказиб берилади.

ЎҚИНГ: MacBook Air’нинг арзон «кушанда»сини бор бўйи билан кўрсатишди