MacBook “кушандаси”ни Asus 2 баробар арзонга сотувга чиқарди
Тайванлик ишлаб чиқарувчи Asus бугунги ноутбук бозоридаги рақобатни ҳисобга олиб, ниҳоят яхши гаджетларни арзон баҳода сотувга чиқаришга қарор қилди. Жумладан, бренднинг сотувга чиққан сўнгги VivoBook S510 лаптопи таниқли MacBook ноутбукларига қарши рақобатга киришади. Қурилма юқори самарадорликка эга платформа ва ихчам ўлчам ҳамда рақибига қараганда анча-мунча арзонлиги билан ўзига хосдир.
Windows 10 операцион тизими бошқарувида фаолият кўрсатадиган VivoBook S510 девайси 7-авлод, яъни энг сўнгги Intel Core i7 процессорида ишлайди. Унинг 15,6 дюймли Full HD (1920 x 1080 пикселли) дисплейи олд панелнинг 80% қисмини эгаллаб олган. Ноутбукда 8 гигабайт сиғимли тезкор хотира мавжуд.
Asus VivoBook S510’нинг ўзига хос жиҳатлари қаторида USB-C ҳамда HDMI портларининг, наушник учун туйнук, қўшимча хотира учун картридер бўлмачаси, бармоқ излари сканери ҳамда клавиатура ости чироғига эгалигини қайд этиш мумкин,
Жумладан, VivoBook S510 корпусининг чап томонида 2 та USB 2.0 портлари, SD/SDHC картридери, шунингдек тизим ва хотира картасининг фаоллигини кўрсатувчи индикатор мавжуд. Корпуснинг ўнг томонида эса қувватлаш учун порт, USB 3.0 (USB Type-C + USB Type A) порти, аудио-туйнук ва HDMI порти учун жой ажратилган.
Металл корпусли гаджетнинг қалинлиги 18 мм ва у 1,7 кг тош босади.
ASUS VivoBook S510 турли жиҳатли талқинларда тақдим қилинади. Ноутбукнинг базавий энг арзон талқини $700 доллардан сотувга чиқади. Унинг энг юқори талқини Core i7 процессори, 8 ГБ тезкор ва 1 терабайтли доимий хотирага эга.
Экспертларнинг фикрича, VivoBook S510 жиҳатлари ва имкониятларига кўра MacBook Air билан бемалол рақобат қила олади.
Айтиш керакки, Xiaomi компанияси 2016 йилда Apple MacBook Air ноутбукига қарши Mi Notebook Air номли ноутбук моделларини сотувга чиқарган эди. Унинг 128 ГБ хотирага эга талқини $735, 256 ГБ талқини $810 доллардан сотувга чиқарилган. Таққослаш учун айтамиз, Core i7 процессори ва 8/256 гигабайтли тезкор хотирага эга MacBook Air’нинг энг арзони $1400 доллардан сотилмоқда.
