MacBook Pro (2017) моделларининг самарадорлиги қанчага ошган?
Жорий ҳафтанинг бошида бўлиб ўтган WWDC 2017 кўргазмасида Apple кўплаб янги маҳсулотларини намойиш этди. Тақдимот давомида янгиланган iMac ҳамда янги чиқарилган iMac Pro билан бирга MacBook ноутбуклари ҳам тилга олиб ўтилди. Уларнинг янгиланишларини айтарли катта янгилик бўлмагани учунми, кўргазмада компания мазкур моделларга жуда катта аҳамият қаратиб ўтирмаган.
Қисқача айтганда, MacBook тизимидаги барча қурилмалар еттинчи авлод Intel Core Kaby Lake процессорига эга бўлган. Жумладан, 12 дюйм экранли MacBook, экрани 13 дюйм диагоналга эга, аммо Touch Bar бўлмаган MacBook Pro, шунингдек, Touch Bar билан жиҳозланган 13/15 дюйм экранли MacBook Pro ноутбуклари ҳам.
MacRumors ресурси мазкур янги ноутбукларнинг ишлаш самарадорлиги қанчага ошганини текшириб кўрди.
Таққослаш учун MacRumors ходимлари Touch Bar’га эга 15 дюймлик MacBook Pro версияларининг 2016 ва 2017 йилги моделларини олишди. Таъкидлаш керакки, 2016 йилги моделга 2,7 ГГц частотада ишловчи олтинчи авлод Intel Core i7 процессори ўрнатилган. Унинг мазкур синовдаги рақиби – бу йилги авлоди эса 2,9 ГГц частотали еттинчи авлод Intel Core i7 процессорида ишлайди.
Синов оммабоп Geekbench 4 бенчмаркида ўтказилди ва унда қуйидаги натижалар қайд этилди:
Янгиланган MacBook Pro самарадорликнинг бир ядроли тестда 13%, икки ядроли тестда бўлса 19,7% ўсганини намойиш этди. 2,8 ГГц частотада ишловчи Core i7 процессори ўрнатилган, базавий конфигурациядаги 15 дюймлик MacBook Pro моделида эса, самарадорлик ўтган йилги – олтинчи авлод Core i7 процессорли авлодига нисбатан атиги 9,5 фоизга ўсган.
3,1 ГГц частотали еттинчи авлод Core i7 ўрнатилган – энг илғор MacBook Pro масаласида бўлса тест натижалари ҳозирча йўқ.
Эслатиб ўтамиз, Apple янги ноутбукларининг нисбатан батафсил хусусиятларини мана бу, Microsoft Surface Laptop’нинг MacBook Pro’дан устунликларини эса мана бу мақоламизда кўриб чиқишингиз мумкин.
