MacBook Pro: Инновацион ноутбук янада мукаммаллашади
Apple сўнгги 4 йил ичида ва ниҳоят, MacBook Pro ноутбукларини такомиллаштиришга қарор қилган кўринади. Apple вакиллари шу орқали унинг савдосини янада оширишга умид боғлашмоқда.
MacBook Pro’нинг янги талқинига оид инновацион жиҳатлардан бири сифатида унинг илғор “ўчириб/ёқиш” тугмасида ўрнатилган бармоқ изларини ўқийдиган Touch ID технологиясининг бўлиши айтилмоқда. Бу ҳақида таниқли 9to5Mac инсайдери ишончли манбаага асосланиб, хабар тарқатган.
Маълумки, Apple компанияси сўнгги iPad ҳамда iPhone қурилмаларида ҳам мазкур технологияни татбиқ этиб келмоқда.
Бу технология турли махфий сўзлардан воз кечиб, мазкур тугмачага бармоқни босиш орқали унинг тизимига кириш, қолаверса Apple Pay орқали пул тўловларини амалга ошириш имкониятини яратади.
MacBook Pro’нинг янги моделлари янада енгил ва юпқа корпусли бўлади. Шунингдек, унда OLED технологиясига эга сенсор панелдан фойдаланилади. Мазкур юпқа ва узун панел линияси клавиатуранинг устки қисмидан ўрин эгаллаб, унинг ёрдамида овоз ва экран ёруғлигини бошқариш мумкин.
Янгича тачпад фойдаланувчининг бармоқ зарбасининг даражасига кўра фаолият кўрсатади. Шу билан бирга, корпусда универсал USB Type-C туридаги портдан фойдаланилади.
Янги ноутбукларда дизайнер ва ўйин ишқибозлари учун айни муддао бўлган кучли график процессорларидан фойдаланилади. Жумладан, MacBook Pro’да ҳали янги технология бўлмиш AMD Polaris GPU видеокартаси татбиқ қилинади. Ушбу видеокарта самарали бўлиш баробарида, олдингиларига қараганда 20% га юпқароқ.
Гарчи, MacBook Pro янада юпқа ва ихчам бўлса-да, бу борада “Олма” корпорациясига тегишли MacBook Air ва 12 дюймли MacBook’дан ўзиб кета олмайди.
Алюминий корпусга эга ноутбуклар кулранг, тилларанг ва кумуш рангли талқинларда ишлаб чиқарилади.
Apple асосчиси Стив Жобс 2010 йилда илк iPad планшетини намойиш қилганида уни персональ компьютерларнинг “кушандаси” деб айтган бўлса ҳам, MacBook Pro каби ноутбуклар гаджетлар бозорида ҳали ҳам оммабоп. Хусусан, сўнгги молиявий йилда MacBook, унинг “Pro” талқинида савдо ҳажми 6% га, $25,5 млрд.га ошган бўлса, iPad планшетлари савдоси 23% га, $23,2 млрд.га тушиб кетган.
Халқаро бозорда 13 дюймли IPS Retina дисплей, 2 ядроли 2.9 ГГц Intel Core i5 процессор, Intel Iris Graphics 6100 видеокартага эга MacBook Pro $1,649.99 доллардан сотилмоқда.
Ҳозирча MacBook Pro’нинг тақдим қилиниш фурсати маълум эмас. Apple’нинг 7 сентябрда ўтадиган тақдимотида эса эътибор янги айфонларга қартилиши айтилмоқда.
